ব্ৰিটেইনৰ এক নতুন প্ৰতিবেদনত সতৰ্ক কৰি দিয়া হৈছে যে বৰ্তমানৰ আইন অনুসৰি প্ৰায় ৯০ লাখ লোক বা দেশখনৰ ১৩ শতাংশ লোকে ব্ৰিটিছ নাগৰিকত্ব হেৰুওৱাৰ সম্ভাৱনা আছে। ৰানিমেড ট্ৰাষ্ট আৰু ৰিপ্ৰিভ নামৰ দুটা সংস্থাই এই প্ৰতিবেদন প্ৰকাশ কৰিছে। প্ৰতিবেদন অনুসৰি, এই আইনসমূহে বিশেষভাৱে মুছলমান সম্প্ৰদায়, দক্ষিণ এছিয়ান, মধ্যপ্ৰাচ্য, আৰু আফ্ৰিকাক প্ৰভাৱিত কৰে।
প্ৰতিবেদনত উল্লেখ কৰা হৈছে যে ব্ৰিটিছ গৃহ সচিব শ্বাবানা মাহমুদে কোনো ব্যক্তিৰ নাগৰিকত্ব বাতিল কৰাৰ ক্ষমতা আছে যদিহে তেওঁ বিশ্বাস কৰে যে ব্যক্তিজনে আন দেশৰ নাগৰিকত্ব লাভ কৰিব পাৰে, যদিও তেওঁলোকৰ সেই দেশৰ সৈতে কোনো ব্যক্তিগত সম্পৰ্ক নাথাকে। এই ক্ষমতা জাতীয় সুৰক্ষা বা জনস্বাৰ্থৰ নামত ব্যৱহাৰ কৰা হয়। প্ৰতিবেদনত ইয়াক “অতিৰিক্ত আৰু গোপন” ক্ষমতা বুলি অভিহিত কৰা হৈছে, যিয়ে মুছলমান সম্প্ৰদায়ৰ বাবে এক উল্লেখযোগ্য ভাবুকিৰ সৃষ্টি কৰিছে।
ইয়াৰ দ্বাৰা আটাইতকৈ বেছি ক্ষতিগ্ৰস্ত দেশসমূহৰ ভিতৰত ভাৰত (৯৮.৪ নিযুত লোক), পাকিস্তান (৬৭.৯ নিযুত লোক), আৰু বাংলাদেশ। ছোমালিয়া, নাইজেৰিয়া, উত্তৰ আফ্ৰিকা, মধ্যপ্ৰাচ্যৰ সৈতে সম্পৰ্ক থকা ব্ৰিটিছ নাগৰিকসকলো বিপদত পৰিছে।
যদি মুছলমানক ব্ৰিটেইনৰ পৰা বহিষ্কাৰ কৰা হয় তেন্তে ভাৰত, পাকিস্তান, বাংলাদেশৰ দৰে দেশত আশ্ৰয় ল’ব। প্ৰতিবেদনত উইণ্ড্ৰাছ কেলেংকাৰীৰ কথা মনত পেলোৱা হৈছে, য’ত কেৰিবিয়ান মূলৰ ব্ৰিটিছ নাগৰিকৰ নাগৰিকত্ব কাঢ়ি লৈ বিতাড়িত কৰা হৈছিল।
বহু সংগঠনে কয় যে, এই আইনসমূহে নাগৰিকত্বৰ দুটা স্তৰ সৃষ্টি কৰে- এটা ব্ৰিটিছ লোকৰ বাবে স্থায়ী আৰু আনটো মুছলমান আৰু সংখ্যালঘু সম্প্ৰদায়ৰ বাবে চৰ্তসাপেক্ষ।২০২২ চনত এখন আইন প্ৰণয়ন কৰা হয়, য’ত বিনা জাননীত নাগৰিকত্ব বাতিল কৰিব পৰা যায়।
২০২৫ চনত নতুন আইন প্ৰৱৰ্তন কৰা হয় যে, আদালতে নাগৰিকত্ব বাতিল কৰাটো ভুল বুলি বিবেচনা কৰিলেও আবেদন সম্পূৰ্ণ নোহোৱালৈকে নাগৰিকত্ব পুনৰ ঘূৰাই দিয়া নহ’ব। ইয়াৰ বাবে বছৰ বছৰ লাগিব পাৰে।
২০১০ চনৰ পৰা ২০০ৰো অধিক লোকৰ নাগৰিকত্ব বাতিল কৰা হৈছিল। এই সময়ত ছামিমা বেগমৰো বাতিল কৰা হৈছিল, আকৌ বাংলাদেশেও তেওঁক নাগৰিকত্ব দিবলৈ অস্বীকাৰ কৰিছিল।
এই প্ৰতিবেদন সন্দৰ্ভত এতিয়াও কোনো মন্তব্য কৰা নাই ব্ৰিটেইনৰ গৃহ বিভাগে। বিশেষজ্ঞসকলে কয় যে এই আইনসমূহে মুছলমান সমাজৰ মাজত নিৰাপত্তাহীনতাৰ ভাৱৰ সৃষ্টি কৰিছে।
