বুধবাৰে দুদিনীয়া ভ্ৰমণসূচীৰে ভাৰতলৈ আহিব ব্ৰিটেইনৰ প্ৰধানমন্ত্ৰী কীৰ ষ্টাৰ্মাৰ। ভাৰত ভ্ৰমণত বাণিজ্য, বিনিয়োগ, আৰু প্ৰযুক্তি সহযোগিতাকে ধৰি ব্যাপক দ্বিপাক্ষিক অংশীদাৰিত্বৰ ওপৰত গুৰুত্ব আৰোপ কৰা হ’ব।
প্ৰধানমন্ত্ৰী নৰেন্দ্ৰ মোদীৰ আমন্ত্ৰণত এই দুদিনীয়া ভ্ৰমণৰ সময়ত দুয়োগৰাকী নেতাই ভাৰত-ব্ৰিটেইনৰ মুক্ত বাণিজ্য চুক্তি (এফটিএ)ৰ সমান্তৰালকৈ জুলাই মাহত চুক্তিবদ্ধ হোৱা ১০ বছৰীয়া ৰোডমেপ ‘ভিজন ২০৩৫’ৰ ওপৰতো চৰ্চা কৰিব।
ব্ৰিটিছ প্ৰধানমন্ত্ৰীগৰাকীৰ সৈতে ১০০ৰো অধিক ব্যৱসায়িক নেতা, বিশ্ববিদ্যালয়ৰ উপাচাৰ্য আৰু সাংস্কৃতিক মুৰব্বীসকলৰ এটা প্ৰতিনিধি দলো ভাৰতলৈ আহিব।
বিশেষজ্ঞসকলৰ মতে ষ্টাৰ্মাৰৰ এই ভ্ৰমণ কৌশলগতভাৱেও তাৎপৰ্যপূৰ্ণ। এই ভ্ৰমণৰ সময়ত দুয়োগৰাকী নেতাই মুম্বাইত অনুষ্ঠিত হ’বলগীয়া গ্ল’বেল ফিনটেক ফেষ্টত ভাষণ দিব।
ব্ৰিটেইনৰ ব্যৱসায় আৰু বাণিজ্য বিভাগে প্ৰকাশ কৰা তথ্য অনুসৰি ভাৰত আৰু ব্ৰিটেইনৰ মাজত সামগ্ৰী আৰু সেৱাৰ মুঠ বাণিজ্য প্ৰায় ৪৪.১ বিলিয়ন পাউণ্ড। জুলাই মাহত এফটিএ স্বাক্ষৰ কৰাৰ পিছত এই সংখ্যা বৃদ্ধি পোৱাৰ সম্ভাৱনা আছে আৰু ২০৩০ চনৰ ভিতৰত দ্বিপাক্ষিক বাণিজ্য দুগুণ কৰাৰ লক্ষ্য নিৰ্ধাৰণ কৰা হৈছে।
