অহা ২২ ছেপ্তেম্বৰত হ’বলগীয়া বিটিচি নিৰ্বাচনৰ বাবে প্ৰতিটো ৰাজনৈতিক দলে তীব্ৰ কৰি তুলিছে প্ৰচাৰ অভিযান। মিত্ৰতা অবিহনেই যিহেতু প্ৰতিটো ৰাজনৈতিক দলে এইবাৰৰ নিৰ্বাচনত অৱতীৰ্ণ হৈছে সেয়ে আগন্তুক বিটিচি নিৰ্বাচন যথেষ্ট আকৰ্ষণীয় হোৱাৰ সম্ভাৱনা প্ৰকট হৈ উঠিছে।
বিজেপিৰ আগ্ৰাসী প্ৰচাৰ অভিযান অব্যাহত থকাৰ লগতে বিটিচি প্ৰধান প্ৰমোদ বড়ো নেতৃত্বাধীন ইউপিপিএল দলেও নিৰন্তৰভাৱে চলাই গৈছে প্ৰচাৰ।
বিজেপিৰ হৈ প্ৰচাৰৰ মূল দায়িত্ব লোৱা মুখ্যমন্ত্ৰী হিমন্ত বিশ্ব শৰ্মাৰ প্ৰচাৰ অভিযানে সকলোৰে দৃষ্টি আকৰ্ষণ কৰাৰ সমান্তৰালকৈ শেহতীয়াভাৱে বিপিএফ প্ৰধান হাগ্ৰামা মহিলাৰীয়েও নামি পৰিছে শক্তি প্ৰদৰ্শনত।
বিভিন্ন হাস্যৰসী মন্তব্যৰ বাবে সংবাদ মাধ্যমৰ শিৰোণাম দখল কৰি থকা হাগ্ৰামা মহিলাৰীয়ে এইবাৰ আন এক মন্তব্যৰ বাবে চৰ্চালৈ আহিছে। তেওঁ এইবাৰ সংবাদ মাধ্যমৰ আগত হেলিকপ্টাৰ সন্দৰ্ভত প্ৰদান কৰিছে মন্তব্য।
বিটিআৰত প্ৰচাৰৰ বাবে ব্যৱহাৰ কৰা হেলিকপ্টাৰত তেল ভৰাবলৈ টকা ক’ত পালে বুলি সাংবাদিকে সোধা প্ৰশ্নৰ উত্তৰত তেওঁ কয়, ‘গুৱাহাটীত ২২ কোটি টকাৰ মাটি বিক্ৰী কৰি তেল ভৰাইছো। চাৰে চাৰি বিঘা মাটি ২২ কোটিত বিক্ৰী কৰিছো।’
সাংবাদিকে সোধা প্ৰশ্নৰ উত্তৰ তেওঁ ৰসিকতাৰে দিয়ে যদিও সম্প্ৰতি মহিলাৰীৰ এই মন্তব্য সামাজিক মাধ্যমত ভাইৰেল হৈ পৰিছে।
উল্লেখ্য যে, বিটিচি নিৰ্বাচনৰ বাবে হাগ্ৰামা মহিলাৰী নেতৃত্বাধীন বি পি এফ দলে ২২টা সমষ্টিৰ বাবে প্ৰাৰ্থীৰ তালিকা ঘোষণা কৰিছে। লাভ কৰা তথ্য অনুসৰি আৰু এদিন বা দুদিনৰ ভিতৰতে বাকী ১৮টা সমষ্টিৰ বাবে দলে দ্বিতীয়খন প্ৰাৰ্থীৰ তালিকা ঘোষণা কৰিব।
