ৰাজ্যিক কেবিনেটৰ গুৰুত্বপূৰ্ণ সিদ্ধান্ত। অসমৰ কোনো হোটেল-ৰেষ্টুৰেণ্টত পৰিৱেশন কৰিব নোৱাৰিব এক বিশেষ মাংস। সামজিক অনুষ্ঠানতো নিষিদ্ধ এই মাংসৰ পৰিৱেশন। অৰ্থাৎ ৰাজহুৱা স্থানতো এই মাংস ভক্ষণ বা পৰিৱেশন কৰিব নোৱাৰিব।
ইয়াৰ পূৰ্বে মন্দিৰৰ পৰা ৫ কিলোমিটাৰ পৰিসৰৰ ভিতৰত বিশেষ মাংসবিধ নিষিদ্ধ কৰা হৈছিল। এতিয়া সমগ্ৰ অসমতে সেয়া কাৰ্যকৰী হ’ব। দিল্লীৰ পৰা ভিডিঅ’ কনফাৰেন্সযোগে কেবিনেট বৈঠকৰ সিদ্ধান্ত সদৰি কৰে মুখ্যমন্ত্ৰী ড০ হিমন্ত বিশ্ব শৰ্মাই।
ইফালে অসম চৰকাৰৰ এই সিদ্ধান্তক লৈ কংগ্ৰেছ, এ আই ইউ ডি এফ আৰু জে ডি ইউয়েও প্ৰতিক্ৰিয়া প্ৰকাশ কৰিছে। জে ডি ইউয়ে কয়, এই সিদ্ধান্তই সমাজত উত্তেজনা বৃদ্ধি কৰিব।
কেন্দ্ৰ আৰু বিহাৰত বিজেপিৰ মিত্ৰ জেডিইউ নেতা কেচি ত্যাগীয়ে কয় যে, ভাৰতৰ সংবিধানে সকলোকে খাদ্যৰ স্বাধীনতা প্ৰদান কৰে। হোটেল বা ৰাজহুৱা স্থানত এই বিশেষ মাংসবিধৰ নিষিদ্ধকৰণত তেওঁলোকে সমৰ্থন নকৰে। ইয়াৰ দ্বাৰা সমাজত উত্তেজনা বিয়পিব যিটো ইতিমধ্যে অতি উচ্চ।
কংগ্ৰেছ নেতা ৰছিদ আলভিয়ে কয় যে, সমগ্ৰ দেশতে এই মাংস নিষিদ্ধ কৰিব লাগে। কিন্তু অসমৰ মুখ্যমন্ত্ৰীৰ এতিয়াহে এই কথা মনত পৰাটোহে আচৰিত। বিজেপি ক্ষমতাত থকা গোৱা আৰু উত্তৰ-পূবকে ধৰি আটাইকেইখন ৰাজ্যতে এই মাংস নিষিদ্ধ কৰিবনে, সেইটোহে লক্ষণীয়।
আনহাতে, কংগ্ৰেছ নেতা গৌৰৱ গগৈয়ে কয় যে, ৰাজ্যত এই বিশেষ মাংসৰ নিষেধাজ্ঞা সন্দৰ্ভত অসমৰ মুখ্যমন্ত্ৰীয়ে ঝাৰখণ্ডত বিজেপিক অপমানজনক পৰাজয়ৰ দিশে লৈ যোৱাৰ পিছত নিজৰ ব্যৰ্থতা লুকুৱাবলৈ চেষ্টা কৰিছে। ঝাৰখণ্ডৰ বুদ্ধিমান ৰাইজৰ দৰে অসমৰ জনসাধাৰণেও আগন্তুক নিৰ্বাচনত অসমৰ বিজেপি নেতাৰ দুৰ্নীতি, অপশাসন আৰু অবৈধ সম্পদক শাস্তি দিব।
অসমৰ এ আই ইউ ডি এফ দলৰ বিধায়ক তথা দলৰ সাধাৰণ সম্পাদক ড০ (হাফিজ) ৰফিকুল ইছলামে কয় যে, কেবিনেটে মানুহে কি খাব বা কি পিন্ধিব সেইটো সিদ্ধান্ত ল’ব নালাগে। বিজেপিয়ে গোৱাৰ লগতে উত্তৰ-পূৰ্বাঞ্চলৰ আন ৰাজ্যসমূহত এই মাংস নিষিদ্ধ কৰিব নোৱাৰে, তেন্তে অসমত কিয়? এই সিদ্ধান্তৰ প্ৰতি তেওঁলোকে বিশেষ গুৰুত্ব নিদিয়ে।
