অসমত সন্দেহজনক নাগৰিকে অবৈধভাৱে দখল কৰি থকা ভূমি দখলমুক্ত কৰাৰ বাবে চৰকাৰ-প্ৰশাসনে চলাই থকা উচ্ছেদ অভিযানৰ প্ৰতি পূৰ্ণ সমৰ্থন আছে কেন্দ্ৰ চৰকাৰৰ। শুকুৰবাৰে গুৱাহাটীত কেন্দ্ৰীয় গৃহমন্ত্ৰী অমিত শ্বাহে কৰা মন্তব্যৰ পৰা এই কথাটো স্পষ্ট হৈ পৰিছে বুলি শনিবাৰে অসমৰ মুখ্যমন্ত্ৰী ড০ হিমন্ত বিশ্ব শৰ্মাই মন্তব্য কৰে।
অসম তথা সমগ্ৰ দেশ অবৈধ অনুপ্ৰৱেশকাৰীৰ পৰা মুক্ত হ’ব বুলি গৃহমন্ত্ৰী শ্বাহে স্পষ্ট কৰি দিয়াৰ লগতে কংগ্ৰেছে বিৰোধিতা কৰি থাকিলেও অসম চৰকাৰে বেদখল মুক্ত কৰাৰ অভিযান অব্যাহত ৰাখিব বুলিও আজি এখন সংবাদমেলত মুখ্যমন্ত্ৰী শৰ্মাই স্পষ্ট কৰি দিয়ে।
মুখ্যমন্ত্ৰী শৰ্মাই কয়, ‘কালি গৃহমন্ত্ৰীৰ মন্তব্যত এটা কথা স্পষ্ট হৈছে যে উচ্ছেদ অভিযানক ভাৰত চৰকাৰৰ সম্পূৰ্ণ সমৰ্থন আছে। তেওঁলোকে আমাক সকলো প্ৰকাৰে সহায় কৰিব। আমি শেষ টুকুৰা মাটি উদ্ধাৰ নকৰালৈকে পূৰ্ণ সমৰ্থন পাই থাকিম।’
সংবাদমেলত মুখ্যমন্ত্ৰী শৰ্মাই দাবী কৰে যে ২০২১ চনৰ মে’ মাহত তেওঁৰ চৰকাৰে দায়িত্ব লোৱাৰ পিছৰে পৰা ১৬০ বৰ্গ কিলোমিটাৰৰো অধিক ভূমি বেদখলৰ পৰা মুক্ত কৰা হৈছে।
মুখ্যমন্ত্ৰী শৰ্মাই লগতে অবৈধভাৱে দখল কৰা বনাঞ্চল, ভিলেজ গ্ৰেজিং ৰিজাৰ্ভ, প্ৰফেশ্যনেল গ্ৰেজিং ৰিজাৰ্ভ, সত্ৰ, নামঘৰৰ লগতে আন আন ৰাজহুৱা স্থান পৰ্যায়ক্ৰমে বেদখলকাৰীৰ পৰা মুক্ত কৰা হ’ব বুলিও উল্লেখ কৰে।
