এসময়ৰ ভাৰতীয় টেষ্ট দলৰ নিৰ্ভৰযোগ্য মিডল অৰ্ডাৰ বেটছমেন চেতেশ্বৰ পূজাৰাই প্ৰথম শ্ৰেণীৰ ক্ৰিকেটত এক বিশেষ অভিলেখ গঢ়িবলৈ সক্ষম হৈছে। পূজাৰাই প্ৰথম শ্ৰেণীৰ কেৰিয়াৰত ৬৬ সংখ্যক শতক অৰ্জন কৰাৰ লগতে দ্বিশতকৰ সংখ্যাও বৃদ্ধি কৰে।
প্ৰথম শ্ৰেণীৰ কেৰিয়াৰৰ এয়া পূজাৰাৰ ১৮তম দ্বিশতক। পূজাৰা এতিয়া প্ৰথম শ্ৰেণীৰ ক্ৰিকেটত সৰ্বাধিক দ্বিশতক অৰ্জন কৰা বিশ্বৰ চতুৰ্থজন বেটছমেন হিচাপে পৰিগণিত হৈছে।
প্ৰথম শ্ৰেণীৰ ক্ৰিকেটত সৰ্বাধিক দ্বিশতক অ্জনৰ অভিলেখ আছে মহান ক্ৰিকেটাৰ ডন ব্ৰেডমেনৰ নামত। প্ৰথম শ্ৰেণীৰ ক্ৰিকেটত ডন ব্ৰেডমেনৰ নামত আছে ৩৭টা ডাবল চেঞ্চুৰীৰ অভিলেখ।
ইফালে পূজাৰাৰ নামত প্ৰথম শ্ৰেণীৰ কেৰিয়াৰত আছে ৬৬টা শতক। এই ক্ষেত্ৰত পূজাৰাই মহান ব্রায়ান লাৰাৰ অভিলেখ ভংগ কৰিছে৷ প্ৰথম শ্ৰেণীৰ কেৰিয়াৰত লাৰাই ৬৫টা শতক অৰ্জন কৰিছিল। ইয়াৰ লগতে পূজাৰাই প্ৰথম শ্ৰেণীৰ কেৰিয়াৰত ২১০০০ ৰান সম্পূৰ্ণ কৰাৰো কৃতিত্ব গঢ়ে।
উল্লেখ্য যে, চলিত ৰঞ্জি ট্ৰফীত ছত্তীশগড় আৰু সৌৰাষ্ট্ৰৰ মাজত অনুষ্ঠিত হোৱা খেলখনত সৌৰাষ্ট্ৰৰ হৈ খেলি পূজাৰাই শতক সম্পূৰ্ণ কৰিছিল। এই শতক সম্পূৰ্ণ কৰাৰ লগে লগে পূজাৰাই ইতিহাস সৃষ্টি কৰি প্ৰথম শ্ৰেণীৰ ক্ৰিকেটত শতক অৰ্জনৰ ক্ষেত্ৰত লাৰাক অতিক্ৰম কৰে।
ইফালে ভাৰতৰ হৈ প্ৰথম শ্ৰেণীৰ ক্ৰিকেটত সৰ্বাধিক শতক অৰ্জন কৰাৰ অভিলেখ শচীন তেণ্ডুলকাৰ আৰু সুনীল গাভাস্কাৰৰ নামত আছে। দুয়োজনে প্ৰথম শ্ৰেণীৰ ক্ৰিকেটত ৮১টা শতক অৰ্জন কৰিবলৈ সক্ষম হৈছে।
ইফালে ছাৰ জেক হবছৰ নামত আছে প্ৰথম শ্ৰেণীৰ ক্ৰিকেটত সৰ্বাধিক শতক অৰ্জন কৰাৰ অভিলেখ। জেক হবছে প্ৰথম শ্ৰেণীৰ ক্ৰিকেটত ১৯৯টা শতক অৰ্জন কৰিছিল।
