আজি সংবিধান দিৱস। দেশত প্ৰতি বছৰে আজিৰ দিনটোত, অৰ্থাৎ ২৬ নৱেম্বৰত সংবিধান দিৱস পালন কৰা হয়।ভাৰতীয় সংবিধানখনে ভাৰতবৰ্ষক এখন কল্যাণকামী গণতান্ত্ৰিক ৰাষ্ট্ৰ হিচাপে প্ৰতিফলিত কৰিছে।
১৯৪৯ চনৰ আজিৰ দিনটোতে ভাৰতৰ সংবিধান গৃহীত হোৱাৰ স্মৃতিত আৰু ভাৰতীয় সংবিধান প্ৰণয়নকাৰীসকলৰ অৱদানক সন্মান জনোৱাৰ্থে এই দিৱস পালন কৰা হয়।
১৯৪৯ চনৰ ২৬ নৱেম্বৰত ভাৰতীয় সংবিধান সভায়ে ভাৰতীয় সংবিধান গৃহীত কৰিছিল আৰু ১৯৫০ চনৰ ২৬ জানুৱাৰীত আমাৰ সংবিধানখন কাৰ্যকৰী কৰা হৈছিল।
ভাৰত চৰকাৰে ২০১৫ চনৰ ১১ অক্টোবৰ তাৰিখে ভাৰতৰ প্ৰধানমন্ত্ৰী নৰেন্দ্ৰ মোদীয়ে মহাৰাষ্ট্ৰৰ মুম্বাইত ভীমৰাও ৰামজী আম্বেদকাৰৰ স্মৃতিত নিৰ্মাণ কৰা সমতাৰ মূৰ্তিৰ আধাৰশিলা স্থাপন কাৰ্যসূচীত ২৬ নৱেম্বৰ তাৰিখে সংবিধান দিৱস পালন কৰাৰ ৰাজহুৱা ঘোষণা কৰিছিল।সংবিধান দিৱসক ‘ৰাষ্ট্ৰীয় আইন দিৱস’ হিচাপেও জনা যায়।
ভাৰতৰ সৰ্বোচ্চ আইন সংবিধানখনে ভাৰতক সাৰ্বভৌম, সমাজবাদী, ধৰ্মনিৰপেক্ষ আৰু গণতান্ত্ৰিক গণৰাজ্য বুলি ঘোষণা কৰিছে আৰু দেশৰ প্ৰতিগৰাকী নাগৰিককে ন্যায়, সমতা আৰু স্বাধীনতাৰ আশ্বাস দিছে তথা ভ্ৰাতৃত্ববোধক প্ৰসাৰিত কৰাৰ প্ৰয়াস কৰিছে।
১৯৫০ চনৰ ২৬ জানুৱাৰীত সংবিধান কাৰ্যকৰী হোৱাৰ সময়ত সংবিধানত মুঠ ৩৯৫ টা অনুচ্ছেদ, ৮টা অনুসূচী আৰু ২২টা সূচী আছিল। অৱশ্যে সম্প্ৰতি দেশৰ সংবিধানখনত ৪৪৮ টা অনুচ্ছেদ, ১২টা অনুসূচী আৰু ২৫ টা সূচী আছে।
সাধাৰণ অৰ্থত সংবিধান দিৱস হৈছে গণতান্ত্ৰিক মূল্যবোধৰ উদযাপন। অৰ্থাৎ ভাৰতীয় সংবিধানত সন্নিৱিষ্ট গণতান্ত্ৰিক নীতিসমূহৰ উদযাপনেই হৈ সংবিধান দিৱসৰ মহত্ব। সংবিধান দিৱসে ভাৰতীয় সংবিধানে প্ৰদান কৰা ন্যায়, স্বাধীনতা, সমতা আৰু ভ্ৰাতৃত্ববোধৰ আদৰ্শক জনমানসলৈ বহন কৰিছে।
‘সংবিধান দিৱস’ উপলক্ষে জানিবলগীয়া কেইটামান তথ্য-
১) সংবিধান প্ৰণেতা ড৹ ভীমৰাও ৰামজী আম্বেদকাৰৰ নেতৃত্বত সংবিধান পৰিষদৰ ২ বছৰ, ১১ মাহ, ১৮ দিনীয়া প্ৰচেষ্টাত সম্পূৰ্ণ হৈ উঠে দেশৰ সংবিধান।
২)ভাৰতীয় সংবিধানখন বিশ্বৰ আটাইতকৈ দীৰ্ঘতম লিখিত সংবিধান হিচাপে স্বীকৃত।
৩)সংবিধানৰ মূল প্ৰতিলিপিটো হাতেৰে লিখা হৈছিল।
৪)সংবিধানৰ মূল প্ৰতিলিপিবোৰ সংসদৰ পুথিভঁৰালৰ ভিতৰত সংৰক্ষণ কৰা হৈছে।
৬)সংবিধানৰ প্ৰতিটো পৃষ্ঠাত এটা সোণৰ পাতৰ ফ্ৰেম আছে।
৭)প্ৰখ্যাত লেখক প্ৰেম নাৰায়ণ ৰায়জাদাই সংবিধানৰ মূল প্ৰতিলিপি প্ৰস্তুত কৰিছিল।
৮)ভাৰতীয় সংবিধানৰ মৌলিক গাঁথনি ‘ভাৰত চৰকাৰ আইন ১৯৩৫’ৰ ওপৰত আধাৰিত।
