বহু চৰ্চিত অসম লোকসেৱা আয়োগৰ চূড়ান্ত ৰায় প্ৰদান কৰিলে আদালতে। আদালতৰ ৰায়ত ৰাকেশ পালসহ ৩২ জন অভিযুক্তক দোষী সাব্যস্ত কৰা হ’ল। ইফালে, ১১ জন অভিযুক্তক দোষমুক্ত ঘোষণা কৰিলে আদালতে। PC আইনৰ ৭ নং ধাৰাৰ অধীনত ৰাকেশ পাল, বসন্ত দলেক ১০ বছৰৰ কাৰাদণ্ড প্ৰদান কৰাৰ নিৰ্দেশ আদালতৰ।
কৃষি উন্নয়ন বিষয়া নিযুক্তি কেলেংকাৰী গোচৰত দীপক ঠাকুৰীয়াৰ বিশেষ আদালতে দোষী সাব্যস্ত কৰে ৰাকেশ পালসহ ৩৩ জন অভিযুক্তক। দোষী সাব্যস্ত কৰা সকলো লোকে আদালতৰ পৰাই যাব লাগিব কাৰাগাৰলৈ।
আনহাতে, কুনাল দাস, বিউটী গগৈ, ফিৰোজ মৰাণ, ছেইজালী জহৰী, ধৃতিমান ৰয়, মুছাৰফ হুছেইন, কৌশিল কলিতা, বিকাশ পিঞ্চা, জ্যোতিবন দত্ত, মৌচুমী শইকীয়াক দোষমুক্ত ঘোষণা কৰিলে আদালতে। আদালতে দোষী সাব্যস্ত কৰা লোকসকলে হেৰুওৱাব চাকৰি।
উল্লেখ্য যে, ২০১৬ চনৰ ৪ নৱেম্বৰৰ সন্ধিয়া খানাপাৰাত থকা এ পি এছ চিৰ কাৰ্যালয়ৰ পৰা ৰাকেশ পালক গ্ৰেপ্তাৰ কৰা হৈছিল। সেই সময়ত এ পি এছ চিৰ কেলেংকাৰী গোচৰৰ তদন্তকাৰী বিষয়া হিচাপে দায়িত্বত আছিল ডিব্ৰুগড় জিলাৰ তদানীন্তন অতিৰিক্ত আৰক্ষী অধীক্ষক সুৰজিৎ সিং পানেছাৰ।
অতিৰিক্ত আৰক্ষী অধীক্ষকগৰাকীৰ নেতৃত্বতেই ৰাকেশ পালৰ লগতে কেলংকাৰীৰ সৈতে জড়িত বহুতো ৰাজপত্রিত বিষয়াক গ্ৰেপ্তাৰ কৰা হৈছিল। তেতিয়াৰ পৰাই আদালতত বিচাৰধীন হৈ আছিল গোচৰ।
অকল ইমানেই নহয় অসম লোকসেৱা আয়োগৰ অধ্যক্ষ হৈ থাকোতে আয়োগৰ বৰঘৰত চাকৰিৰ বজাৰ মেলিছিল ৰাকেশ পাল বাহিনীয়ে। দুৰ্নীতিৰ সদাগৰ ৰাকেশ পালক গ্ৰেপ্তাৰৰ পাছত আয়োগৰ সদস্য-পৰীক্ষাৰ নিয়ন্ত্ৰক গ্ৰেপ্তাৰ হৈছিল ডিব্ৰুগড় আৰক্ষীৰ হাতত। পৰৱৰ্তী পৰ্যায়ত তদন্তকাৰী আৰক্ষীয়ে ৰাকেশ পালৰ পৰা চাকৰি ক্ৰয় কৰা ৬০ জন বিষয়া, দালাল, মধ্যভোগীক গ্ৰেপ্তাৰ কৰিছিল।
ইফালে ডিব্ৰুগড় আৰক্ষীৰ হাতত বন্দী হৈ থকা সময়তে পুনৰ এ পি এছ চিৰ অধীনৰ কৃষি উন্নয়ন বিষয়া নিযুক্তি কেলেংকাৰীত ৰাকেশ পালৰ বিৰুদ্ধে ভঙাগড় থানাত ১৫৯/১৭ নম্বৰত গোচৰ ৰুজু হৈছিল।
ডিব্ৰুগড় থানাত ৰুজু হোৱা ৯৩৬/১৬ নম্বৰৰ গোচৰত ৰাকেশ পালে ইতিমধ্যে জামিন লাভ কৰিছিল। ভঙাগড় থানাত ৰুজু হোৱা গোচৰৰ বাহিৰে আন সকলো গোচৰত ইতিমধ্যে জামিন লাভ কৰিছিল ৰাকেশ পালে।
