৯ মাৰ্চত নিউজিলেণ্ডক পৰাস্ত কৰি চেম্পিয়নছ ট্ৰফীৰ বিজয়ী হয় টীম ইণ্ডিয়া। এই প্ৰতিযোগিতাত তৃতীয়বাৰৰ বাবে ভাৰতীয় দলটো চেম্পিয়ন হয়। এই ঐতিহাসিক জয়ৰ উদযাপনৰ বাবে BCCI য়ে সমগ্ৰ দলটোৰ ওপৰত টকাৰ বৰষুণ কৰিছে।
২০ মাৰ্চত ব’ৰ্ডে প্ৰতিযোগিতাখনৰ লগত জড়িত দলৰ খেলুৱৈ আৰু প্ৰশিক্ষক কৰ্মচাৰীকে ধৰি সকলো সদস্যৰ বাবে ৫৮ কোটি টকাৰ পুৰস্কাৰ ঘোষণা কৰে। BCCI য়ে নিজৰ বিবৃতিত প্ৰতিযোগিতাৰ সময়ছোৱাত ৰোহিত শৰ্মাকে ধৰি সকলো খেলুৱৈকে প্ৰচণ্ড প্ৰদৰ্শনৰ বাবে প্ৰশংসা কৰে।
BCCI য়ে এক বিবৃতিযোগে এই পুৰস্কাৰৰ কথা ঘোষণা কৰে। ব’ৰ্ডে কয় যে, অধিনায়ক ৰোহিত শৰ্মাৰ নেতৃত্বত ভাৰতে প্ৰতিযোগিতাখনত নিজৰ আধিপত্য বজাই ৰাখিছিল। চাৰিটা শক্তিশালী জয়ৰে ফাইনেলত প্ৰৱেশ কৰে ভাৰতীয় দলটোৱে। বাংলাদেশৰ বিৰুদ্ধে ৬ উইকেটত জয়লাভ কৰি দলটোৱে অভিযান আৰম্ভ কৰে। তাৰ পিছত ফাইনেলত নিউজিলেণ্ডক পৰাস্ত কৰে।
ব’ৰ্ডে লগতে কয় যে, আইচিচি চেম্পিয়নছ ট্ৰফী ২০২৫ জয় কৰাৰ পিছত টিম ইণ্ডিয়াৰ বাবে ৫৮ কোটি টকাৰ নগদ পুৰস্কাৰ ঘোষণা কৰি BCCI যথেষ্ট আনন্দিত। খেলুৱৈ, প্ৰশিক্ষক আৰু সহায়ক কৰ্মচাৰী আৰু বাছনি সমিতিৰ সদস্যসকলক সন্মান জনোৱাৰ উদ্দেশ্যে এই পুৰস্কাৰ ঘোষণা কৰা হৈছে যদিও কিমান টকা কাক দিয়া হ’ব সেই কথা ব’ৰ্ডে প্ৰকাশ কৰা নাই।
