গুজৰাট টাইটানছৰ বিৰুদ্ধে ধুমুহাময় শতক অৰ্জন কৰি সকলোকে আচৰিত কৰি তুলিছে বৈভৱ সূৰ্য্যবংশীয়ে। ১৪ বছৰ বয়সত জয়পুৰৰ ছাৱাই মানসিং ষ্টেডিয়ামত আলোড়নৰ সৃষ্টি কৰে বৈভৱ।
ঈশান্ত শৰ্মা, প্ৰসিদ্ধ কৃষ্ণ, মহম্মদ চিৰাজ, ৱাশ্বিংটন সুন্দৰ, ৰছিদ খানৰ দৰে বলাৰো যেন তেওঁৰ সন্মুখত অসহায়। ৰাজস্থান ৰয়েলছৰ এইগৰাকী যুৱ খেলুৱৈয়ে ৩৫ বছৰ বয়সত শতক অৰ্জন কৰে।আই পি এলত শতক অৰ্জন কৰা ভাৰতীয় বেটছমেন হিচাপে পৰিগণিত হয়।
আই পি এলত সৰ্বাধিক দ্রুত শতক অর্জন কৰাৰ ক্ষেত্রত দ্বিতীয় স্থান দখল কৰে বৈভৱে৷ তেওঁ ৫ বলত শতক অৰ্জন কৰে। এই ১৪ বছৰীয়া বেটছমেনে ইউছুফ পাঠানকো পিছ পেলায়। ২০১০ চনত মুম্বাই ইণ্ডিয়ানছৰ বিৰুদ্ধে ৰাজস্থানৰ হৈ ৩৭ বলত ১০০ ৰানৰ সীমা অতিক্ৰম কৰিছিল পাঠানে।এতিয়া তেওঁকো পিছ পেলাইছে বৈভৱে। ইয়াৰ বাহিৰেও ৰাজস্থানৰ এই যুৱ খেলুৱৈগৰাকীয়ে নিজৰ নামত আন এক অভিলেখ গঢ়িবলৈ সক্ষম হয়।
টি-২০ ক্ৰিকেটত শতক অৰ্জন কৰা আটাইতকৈ কম বয়সীয়া খেলুৱৈ হিচাপে পৰিগণিত হয় বৈভৱ। ১২ বছৰীয়া অভিলেখ গঢ়িছে বৈভৱে। ২০১৩ চনত মুম্বাইৰ বিৰুদ্ধে মহাৰাষ্ট্ৰৰ হৈ খেলি থকাৰ সময়তে বিজয় জোলে ১৮ বছৰ বয়সত শতক অৰ্জন কৰিছিল। এতিয়া বৈভৱে ১৪ বছৰ বয়সত টি-২০ত শতক অৰ্জন কৰি বিশ্ব অভিলেখ গঢ়িলে।
টি-২০ শতক অৰ্জন কৰা আটাইতকৈ কম বয়সীয়া খেলুৱৈ-
- ১৪ বছৰ- বৈভৱ সূৰ্য্যবংশী (ৰাজস্থান ৰয়েলছ) বনাম গুজৰাট টাইটানছ, ২০২৫
- ১৮ বছৰ- বিজয় জোল (মহাৰাষ্ট্ৰ) বনাম মুম্বাই, ২০১৩
- ১৮ বছৰ– পাৰভেজ হোছেইন ইমন (বৰিশাল) বনাম ৰাজশাহী, ২০২০
- ১৮ বছৰ- গুস্তাভ মাকৌন (ফ্ৰান্স) বনাম ছুইজাৰলেণ্ড, ২০২২
মেচখনত কি হ’ল?
ৰাজস্থানৰ ভাৰপ্ৰাপ্ত অধিনায়ক ৰিয়ান পৰাগে টছত জয়লাভ কৰি প্ৰথমে বলিং কৰাৰ সিদ্ধান্ত লয়। গুজৰাটে ২০ অভাৰত ৪ উইকেটত ২০৯ ৰান সংগ্ৰহ কৰে। অধিনায়ক শুভমান গিলে ৫০ বলত ৮৪ ৰান, জোছ বাটলাৰে ২৬ বলত অপৰাজিত ৫০ ৰান আৰু ৩০ বলত ছাই সুদৰ্শনে ৩৯ ৰান সংগ্ৰহ কৰে। ইয়াৰ প্ৰত্যুত্তৰত ৰাজস্থানে ১৫.৫ অভাৰত ২ উইকেটত ২১২ ৰান সংগ্ৰহ কৰি মেচখনত জয়লাভ কৰে। বৈভৱে ৩৮টা বলত ১০১ ৰান সংগ্ৰহ কৰে। তেওঁ ৭টা চাৰি আৰু ১১টা ছয় কৰে। তেওঁৰ ষ্ট্ৰাইক ৰেট আছিল ২৬৫.৭৯। যশস্বী জয়ছৱালে ৪০টা বলত ৭০ ৰান কৰি অপৰাজিত হৈ থাকে আৰু ৰিয়ান পৰাগে ১৫টা বলত ৩২ ৰান কৰি অপৰাজিত হৈ থাকে।
