ক্ৰিকেটৰ জগতখনত দেখা গৈছে এটা ডাঙৰ ঘটনা। ভাৰতৰ বিৰুদ্ধে কেতিয়াও এখনো আন্তঃৰাষ্ট্ৰীয় মেচ খেলি নোপোৱা ইটালীয়ে এতিয়া ২০২৬ চনৰ টি-২০ বিশ্বকাপৰ বাবে যোগ্যতা অৰ্জন কৰিছে। ইউৰোপ ৰিজিঅ’ন ফাইনেলত শক্তিশালী প্ৰদৰ্শন কৰি প্ৰথমবাৰৰ বাবে আইচিচি টি-২০ বিশ্বকাপত স্থান লাভ কৰিছে ইটালীয়ে।
যদিও শেষৰখন মেচত নেদাৰলেণ্ডৰ হাতত পৰাজয়ৰ সন্মুখীন হ’বলগীয়া হৈছিল, তথাপিও প্ৰতিযোগিতাখনত উন্নত ৰান ৰেটৰ ভিত্তিত আগবাঢ়িছে।
১১ জুলাইত হেগত অনুষ্ঠিত হোৱা প্ৰতিযোগিতাখনৰ অন্তিমখন খেলত ইটালীয়ে প্ৰথমে বেটিং কৰি ৭ উইকেটত ১৩৪ ৰান সংগ্ৰহ কৰে। ইয়াৰ প্ৰতিক্ৰিয়া স্বৰূপে নেদাৰলেণ্ডৰ দলটোৱে ১৬.২ অভাৰত মাত্ৰ এটা উইকেট হেৰুৱাই সহজেই লক্ষ্যত উপনীত হয়। ইয়াৰ লগে লগে নেদাৰলেণ্ড দলটোৱেও বিশ্বকাপত নিজৰ স্থান নিশ্চিত কৰিছে।
এই পৰাজয়ৰ বাবে ইটালীয়ে ২ পইণ্ট লাভ কৰা নাছিল যদিও ইতিমধ্যে ৫ পইণ্টেৰে পইণ্ট তালিকাৰ দ্বিতীয় স্থানত উপনীত হৈছিল। যিহেতু জাৰ্চিৰ দলটোও ৫ পইণ্টত আছিল, সেয়েহে নেট ৰাণ ৰেটে ফলাফল নিৰ্ণয় কৰিছিল যাৰ বাবে ইটালীয়ে যোগ্যতা অৰ্জন কৰিছিল। ইটালীৰ নেট ৰান ৰেট আছিল +০.৬১২, আনহাতে জাৰ্চিৰ নেট ৰান ৰেট আছিল +০.৩০৬, যাৰ বাবে ইটালীয়ে বিশ্বকাপৰ টিকট বুকিং কৰি ইতিহাস ৰচনা কৰিছে।
কোৱালিফায়াৰত ইটালীৰ যাত্ৰা-
ইটালীয়ে মুঠ ৪খন মেচ খেলিছিল, য’ত আশা কৰাতকৈ সুপ্ৰদৰ্শন কৰিছে।
- ৫ জুলাইত ইটালীয়ে গাৰ্নচিক ৭ উইকেটত পৰাস্ত কৰে।
- ৬ জুলাইত জাৰ্চিৰ বিৰুদ্ধে খেলিছিল।
- ৯ জুলাইত স্কটলেণ্ডৰ দৰে শক্তিশালী দল এটাক ১২ ৰানত পৰাস্ত কৰি নিজৰ স্থান নিশ্চিত কৰি স্কটলেণ্ডক বাহিৰ হোৱাৰ পথ দেখুৱাইছিল।
- ১১ জুলাইত ইটালীয়ে অন্তিমখন খেলত নেদাৰলেণ্ডৰ বিৰুদ্ধে ৯ উইকেটত পৰাজয়ৰ সন্মুখীন হ’বলগীয়া হৈছিল যদিও ইয়াৰ উজ্জ্বল প্ৰদৰ্শন আৰু ৰান ৰেটে বিশ্বকাপলৈ লৈ যায়।
ভাৰত আৰু শ্ৰীলংকাৰ আয়োজনত ২০২৬ চনত অনুষ্ঠিত হ’ব টি-২০ বিশ্বকাপ। ইয়াত প্ৰথমবাৰৰ বাবে ইটালীৰ দলটোৱে এই বৃহৎ মঞ্চত খেলা দেখা যাব। ক্ৰিকেটৰ এই মহান খেলখনত এটা নতুন আৰু অদৃশ্য দলৰ প্ৰৱেশে প্ৰতিযোগিতাখনক আৰু অধিক ৰোমাঞ্চকৰ কৰি তুলিব।
