ভাৰতীয় মহিলা ক্ৰিকেটাৰ সৰ্ববৃহৎ ছুপাৰষ্টাৰ স্মৃতি মান্ধনাৰ সংগীৰ বিষয়ে সকলোৱে জানিব বিচাৰে। স্মৃতি মান্ধনাই ক্ৰিকেটৰ জগতত বৰ্তমান সু-প্ৰদৰ্শন কৰিব নোৱাৰিলেও ছচিয়েল মিডিয়াত সদায় চৰ্চিত হৈ আছে।
এতিয়া স্মৃতিৰ বিবাহৰ বিষয়ে অবিৰতভাৱে চলি আছে চৰ্চা, বলীউডৰ এগৰাকী তাৰকাক চিৰদিনৰ বাবে নিজৰ সংগী কৰি তুলিবলৈ সাজু হৈছে এই ক্ৰিকেটাৰ গৰাকীয়ে।
বলীউড আৰু ক্ৰিকেটৰ সম্পৰ্ক বহুত পুৰণি। বহু ক্ৰিকেটাৰে বলীউডৰ তাৰকাক নিজৰ সংগী কৰি তুলিছে। যদিও মহিলা ক্ৰিকেটাৰগৰাকীয়ে এতিয়ালৈকে এই কাম কৰা নাছিল, কিন্তু এতিয়া অতি সোনকালে হ’বলৈ গৈ আছে।
ভাৰতীয় মহিলা দলৰ উপ-অধিনায়ক তথা মেধাৱী অ’পেনিং বেটছমেন স্মৃতি মান্ধনাই এই যুৱ বলীউড পৰিচালকগৰাকীৰ প্ৰেমত পৰিছে। যাৰ নাম পলাশ মুছল, যি কেৱল পৰিচালক নহয়, সুৰকাৰো।
আচলতে পলাশ মুছল হৈছে বলীউডৰ এগৰাকী অতি সফল কণ্ঠশিল্পী পলাক মুচলৰ প্ৰকৃত ভাতৃ। বিগত এবছৰত পলাশৰ সৈতে কেইবাবাৰো দেখা গৈছে স্মৃতিক। এতিয়া তেওঁলোকৰ প্ৰেমে ছচিয়েল মিডিয়াত ব্যাপক চৰ্চা লাভ কৰা দেখা গৈছে।
ডব্লিউ পি এলৰ চেম্পিয়ন হোৱাৰ পিছত মান্ধনাই ট্ৰফী হাতত লৈ পলাশৰ সৈতে এখন ছবি ক্লিক কৰিছিল। যিখন ফটো এতিয়া ছচিয়েল মিডিয়াত অতি ভাইৰেল।
এছিয়া কাপ ২০২৪ৰ সময়ত স্মৃতি মান্ধনাই যেতিয়া ২৮ সংখ্যক জন্মদিন পালন কৰিছিল, তেতিয়া পলাশো তাত টীম ইণ্ডিয়াৰ খেলুৱৈসকলৰ সৈতে উপস্থিত আছিল। পিছত তেওঁ ছ’চিয়েল মিডিয়াত পোষ্ট কৰি নিজৰ স্মৃতিলৈ নিজৰ শুভাকাংক্ষা প্ৰকাশ কৰে।
বৰ্তমান ক্ৰিকেটৰ জগতখনত মান্ধনাৰ দিন বৰ ভাল চলি থকা নাই। শেহতীয়াকৈ অনুষ্ঠিত হোৱা টি-২০ বিশ্বকাপৰ সময়ত দুৰ্ভাগ্যজনকভাৱে ব্যৰ্থ হৈছে। যাৰ বাবে ছেমি ফাইনেলতো প্ৰৱেশ কৰিব পৰা নাই টীম ইণ্ডিয়াই। বৰ্তমান সময়ত সকলো অনুৰাগীয়ে আশাবাদী যে, স্মৃতি মান্ধনাই অতি সোনকালে নিজৰ ফৰ্মলৈ ঘূৰি আহিব।
