বাংলাদেশৰ পদচ্যুত প্ৰধানমন্ত্ৰী শ্বেখ হাছিনাৰ ওপৰত কঠোৰ পদক্ষেপ গ্ৰহণ কৰিছে দেশখনৰ এখন আদালতে। বুধবাৰে বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণে শ্বেখ হাছিনাসহ কেইবাজনো লোকৰ বিৰুদ্ধে গ্ৰেপ্তাৰী পৰোৱানা জাৰি কৰিছে।
আৱামি লীগ চৰকাৰৰ অধীনত অপহৰণ আৰু মানৱতাৰ বিৰুদ্ধে অপৰাধৰ অভিযোগত শ্বেখ হাছিনাকে ধৰি আন বহু লোকৰ বিৰুদ্ধে এই গ্ৰেপ্তাৰী পৰোৱানা জাৰি কৰে।
সংবাদ মাধ্যমৰ খবৰ অনুসৰি ন্যায়াধীশ মহম্মদ গোলাম মুৰ্তুজা মজুমদাৰৰ নেতৃত্বত তিনিজনীয়া বিচাৰপীঠে দুটা পৃথক গোচৰত দাখিল কৰা অভিযোগ সন্দৰ্ভত বিচাৰ চলায়। এটা স্থানীয় সংবাদ মাধ্যমৰ মতে, হাছিনা আৰু আন ২৯ জনৰ বিৰুদ্ধে নিৰাপত্তা সংস্থাৰ দ্বাৰাই গোপনে ৰাজনৈতিক বিৰোধীক আটক, নিৰ্যাতন, অপহৰণ কৰাৰ অভিযোগ উত্থাপন হৈছে।
ইফালে চৰকাৰী সংবাদ সংস্থা বিএছএছৰ মতে, আন্তঃৰাষ্ট্ৰীয় অপৰাধ ন্যায়াধিকৰণে শ্বেখ হাছিনা আৰু গোচৰৰ সৈতে জড়িত অন্যান্য ব্যক্তিৰ বিৰুদ্ধে গ্ৰেপ্তাৰৰ পৰোৱানা জাৰি কৰি অভিযুক্তসকলক ২২ অক্টোবৰত আদালতত হাজিৰ হ’বলৈ নিৰ্দেশ প্ৰদান কৰা হৈছে।
উল্লেখ্য যে, চৰকাৰৰ বিৰুদ্ধে বাংলাদেশৰ লাখ-লাখ শিক্ষাৰ্থীয়ে সাব্যস্ত কৰা প্ৰতিবাদৰ মাজতেই যোৱা বৰ্ষৰ ৫ আগষ্টত শ্বেখ হাছিনাই ভাৰতলৈ পলায়ন কৰিছিল।
