উত্তৰ প্ৰদেশৰ কানপুৰৰ ঘন জনবসতিপূৰ্ণ অঞ্চল মূলগঞ্জত এক শক্তিশালী বিস্ফোৰণৰ খবৰ লাভ কৰা গৈছে। এই বিস্ফোৰণত কেইবাজনো লোক আহত হোৱা বুলি খবৰ ওলাইছে ৰাষ্ট্ৰীয় সংবাদ মাধ্যমত।
বিস্ফোৰণ সংঘটিত হোৱা মুলগঞ্জ হৈছে এখন ডাঙৰ ফটকাৰ বজাৰ। দীপাৱলী উৎসৱৰ সময়ত মূলগঞ্জ বজাৰত ফটকাৰ বৃহৎ ব্যৱসায় দেখা যায়। কিছু সময়ৰ পূৰ্বে সংঘটিত হৈছিল এই বিস্ফোৰণ। আহতসকলক চিকিৎসাৰ বাবে কানপুৰৰ চৰকাৰী চিকিৎসালয়লৈ প্ৰেৰণ কৰা হৈছে। এই বিস্ফোৰণত ৮ জন লোক আহত হোৱা বুলি জানিব পৰা গৈছে।
ডগ স্কোৱাড, বোমা নিষ্কাশন স্কোৱাড আৰু কেইবাখনো থানাৰ আৰক্ষী ঘটনাস্থলীত উপস্থিত হয়। বেয়াকৈ ক্ষতিগ্ৰস্ত অৱস্থাত উদ্ধাৰ হৈছে দুখন স্কুটাৰ। আৰক্ষীয়ে তদন্ত অব্যাহত ৰাখিছে।
কানপুৰৰ যুটীয়া আৰক্ষী আয়ুক্ত (চিপি) আশুতোষ কুমাৰে সংবাদ মাধ্যমক জনোৱা মতে, ৰখাই থোৱা দুখন স্কুটীৰ পৰা এই বিস্ফোৰণ সংঘটিত হয়।
তেওঁ উল্লেখ কৰে যে কোটোৱালি অঞ্চলৰ এটা ঘৰৰ সন্মুখৰ এখন দোকানত সংঘটিত হৈছে এই ঘটনা। সন্ধিয়া প্ৰায় ৭.১৫ বজাত সংঘটিত এই বিস্ফোৰণত এগৰাকী মহিলাকে ধৰি মুঠ আঠজন লোক আহত হয়।
