ৰয়েল চেলেঞ্জাৰ্ছ বাংগালুৰুৱে আই পি এল খিতাপ দখলৰ পিছতে বুধবাৰে বাংগালুৰুত আয়োজন কৰা বিজয় উৎসৱত হোৱা পদপিষ্টৰ ঘটনাক লৈ ৰয়েল চেলেঞ্জাৰ্ছ বাংগালুৰুৰ বিৰুদ্ধে গোচৰ ৰুজু কৰা হৈছে। ঘটনাটো সংঘটিত হোৱাৰ ২৪ ঘণ্টাৰ পিছত এই ব্যৱস্থা গ্ৰহণ কৰা হৈছে।
আৰ চি বি, ডি এন এ (ইভেণ্ট মেনেজাৰ), কৰ্ণাটক ক্ৰিকেট এছ’চিয়েশ্যনৰ বিৰুদ্ধে কব্বন পাৰ্ক আৰক্ষী থানাত এজাহাৰ দাখিল কৰা হৈছে। এজাহাৰত পদপিষ্টৰ ঘটনাটোত অপৰাধমূলক গাফিলতিৰ কথা উল্লেখ কৰা হৈছে। এজাহাৰত ১০৫, ১২৫ (১) (২), ১৩২, ১২১/১, ১৯০ r/w ৩ (৫) ধাৰা জাৰি কৰা হৈছে।
উল্লেখ্য যে, ৩ জুনত অনুষ্ঠিত হোৱা আই পি এলৰ ফাইনেলত আৰ চি বিয়ে পঞ্জাব কিংছক ৬ ৰানত পৰাস্ত কৰি প্ৰথমবাৰৰ বাবে খিতাপ দখল কৰে। খিতাপ দখলৰ পাছতেই ৪ জুনত দলটোক শুভেচ্ছা জনোৱাৰ উদ্দেশ্যে উলিওৱা হৈছিল বিজয় উৎসৱ।
৩ জুনত ৰাতিপুৱাৰে পৰা বাংগালুৰুৰ ৰাজপথত ভিৰ কৰিছিল হাজাৰ-হাজাৰ অনুৰাগীয়ে। ভিৰ নিয়ন্ত্ৰণ বাহিৰলৈ যোৱাৰ আশংকা প্ৰকাশ কৰি আৰক্ষীয়ে ভিকট্ৰি পেৰেডেৰ অনুমতি প্ৰদান নকৰিলে। আৰক্ষীয়ে চিন্নাস্বামী ষ্টেডিয়ামত আযোজন কৰা অনুষ্ঠানকো স্থগিত ৰাখিবলৈ অনুৰোধ জনাইছিল। কিন্তু আৰক্ষীৰ অনুৰোধক আওকান কৰি এই অনুষ্ঠান আযোজন কৰিছিল।
উল্লেখ্য যে, কালি সংঘটিত পদপিষ্টৰ ঘটনাত ১১ জন লোকৰ মৃত্যু হোৱাৰ লগতে ৫০ৰো অধিক লোক আহত হৈছিল। আজি ৰাষ্ট্ৰীয় মানৱ অধিকাৰ আয়োগে এই কৰুণ ঘটনাৰ বুজ লয়। এই দলটোৱে জিলা প্ৰশাসন আৰু আৰক্ষীক জাননী জাৰি কৰি এসপ্তাহৰ ভিতৰত প্ৰতিবেদন দাখিল কৰিবলৈ কৈছে।
