কৰ্ণাটকৰ মুখ্যমন্ত্ৰী ছিদ্দাৰমায়াৰ বিৰুদ্ধে ভূমি কেলেংকাৰিৰ গোচৰ ৰুজু কৰা হৈছে। মঙলবাৰে ৰাজ্যখনৰ ৰাজ্যপালে মুখ্যমন্ত্ৰীগৰাকীৰ বিৰুদ্ধে তদন্ত চলাবলৈ দিয়া সন্মতিক প্ৰত্যাহ্বান জনাই ছিদ্দাৰামায়াই জনোৱা আবেদন কৰ্ণাটক উচ্চ ন্যায়ালয়ে খাৰিজ কৰিছিল।
আবেদন খাৰিজ কৰি ন্যায়াধীশ এম নাগপ্ৰসন্নাই কৈছিল, “আবেদনখনত উল্লেখ কৰা কথাবোৰৰ তদন্তৰ প্ৰয়োজন। মুখ্যমন্ত্ৰীৰ পৰিয়াল মুদা ভূমি কেলেংকাৰী গোচৰৰ সৈতে জড়িত, সেয়ে তেওঁৰ আবেদন খাৰিজ কৰা হৈছে।”
ইয়াৰ পিছতে শুকুৰবাৰে ছিদ্দাৰমাইয়াৰ বিৰুদ্ধে এফআইআৰ ৰুজু কৰে মাইছ’ৰ লোকায়ুক্তই। এফআইআৰৰ প্ৰতিলিপিও আদালতত দাখিল কৰিব লোকায়ুক্তই।
উল্লেখ্য যে, মাইছ’ৰ আৰ্বান ডেভেলপমেণ্ট অথৰিটী চমুকৈ মুদা (MUDA)ই ছিদ্দাৰামায়াৰ পত্নীক চহৰৰ মাজ-মজিয়াতে ১৪টাকৈ স্থানত চৰকাৰী মাটি আৱণ্টন দিছিল।
এই তথ্য পোহৰলৈ অহাৰ পিছতে বেংগালুৰুৰ সমাজকৰ্মী প্ৰদীপ কুমাৰ, টি জে আব্ৰাহাম আৰু মহীশূৰৰ সমাজকৰ্মী স্নেহময়ী কৃষ্ণাই মুখ্যমন্ত্ৰীৰ ছত্ৰছায়াত মুদাই ছিদ্দাৰামায়াৰ পত্নীক অবৈধভাৱে ভূমি আৱণ্টন দিয়াৰ অভিযোগ তুলি তেওঁৰ বিৰুদ্ধে তদন্ত চলাব লাগে বুলি দাবী কৰি ৰাজ্যপালৰ ওচৰ চাপিছিল।
দৰাচলতে ১৬ আগষ্টত কৰ্ণাটকৰ ৰাজ্যপাল থাৱৰচন্দ গেহলটে ১৯৮৮ চনৰ দুৰ্নীতি প্ৰতিৰোধ আইনৰ ১৭এ ধাৰা আৰু ভাৰতীয় নাগৰিক সুৰক্ষা সংহিতা (বিএনএছএছ) ২০২৩ৰ ২১৮ ধাৰাত ছিদ্দাৰমায়াৰ বিৰুদ্ধে গোচৰ চলাবলৈ অনুমতি দিছিল।
ইয়াৰ পিছতে ১৯ আগষ্টত উচ্চ ন্যায়ালয়ত ৰাজ্যপালৰ এই নিৰ্দেশক প্ৰত্যাহ্বান জনাইছিল মুখ্যমন্ত্ৰী সিদ্দাৰমাইয়াই। কিন্তু ২৪ ছেপ্তেম্বৰত মুখ্যমন্ত্ৰীৰ আবেদন খাৰিজ কৰিছিল উচ্চ ন্যায়ালয়ে।
উল্লেখ্য যে মাইছ’ৰ আৰ্বান ডেভেলপমেণ্ট অথৰিটী চমুকৈ মুদা (MUDA)ই ছিদ্দাৰামায়াৰ পত্নীক চহৰৰ মাজ-মজিয়াতে ১৪টাকৈ স্থানত চৰকাৰী মাটি আৱণ্টন দিছিল।
