আগন্তুক বিটিচি পৰিষদীয় নিৰ্বাচনত কোনো ৰাজনৈতিক দলৰ সৈতে মিত্ৰতা নকৰে গণ সুৰক্ষা পাৰ্টিয়ে। শুকুৰবাৰে এই কথা স্পষ্ট কৰি দিছে বিটিচি পাৰিষদ ঘনশ্যাম দাসে। ঘনশ্যাম দাস বিটিচিৰ অন্তৰ্গত দিহিৰা পৰিষদীয় সমষ্টিৰ জিএছপিৰ নিৰ্বাচিত পাৰিষদ।
শেহতীয়াকৈ অবড়ো সুৰক্ষা সমিতিৰ কেন্দ্ৰীয় সম্পাদক জোন দাসে হাগ্ৰামা মহিলাৰী নেতৃত্বাধীন বিপিএফৰে গণ সুৰক্ষা পাৰ্টিৰ নিৰ্বাচনী মিত্ৰতা হ’ব বুলি দাবী কৰিছিল।
জোন দাসৰ দাবীক নস্যাৎ কৰি গণ সুৰক্ষা পাৰ্টিয়ে কোনো দলৰ সৈতে নিৰ্বাচনী মিত্ৰতাত আৱদ্ধ হ’বলৈ কোনো ধৰণৰ চিন্তা চৰ্চা কৰা নাই বুলি সংবাদমেলযোগে ৰাজহুৱা কৰিছে জিএছপি নেতা ঘনশ্যাম দাসে।
নেতাগৰাকীয়ে ইয়াকো কয় যে বিটিআৰৰ সকলো শ্ৰেণীৰ অনাবড়ো ৰাইজৰ স্বাৰ্থ সুৰক্ষিত কৰাৰ বাবে জন্ম হৈছিল জিএছপিৰ। সমাগত বিটিচি পৰিষদীয় নিৰ্বাচনৰ বাবে অবড়ো সুৰক্ষা সমিতিৰ নেতা জোন দাসকে ধৰি সংগঠনটোৰ সকলো স্তৰৰ নেতা-কৰ্মীক গণ সুৰক্ষা পাৰ্টিৰ হৈ কাম কৰি যাবলৈ মুকলি আহ্বান জনাই পাৰিষদ ঘনশ্যাম দাসে।
