জাৰ্মানীৰ বিলেফেল্ড চহৰৰ এখন আদালতৰ বাহিৰত তীব্ৰ গুলীচালনা সংঘটিত হোৱাৰ খবৰ আহিছে। পেছাদাৰী বক্সাৰ বেছাৰ নিমানীক হত্যা কৰাৰ অভিযোগত অভিযুক্ত হুছেইন আক্কুৰ্টৰ গোচৰৰ শুনানিৰ সময়ত আদালতৰ বাহিৰত গুলীচালনা হয়।
স্থানীয় সময় অনুসৰি নিশা প্ৰায় ১:৩০ বজাত আদালতৰ প্ৰস্থান গেটৰ পৰা ১৫০ মিটাৰ দূৰত্বত সংঘটিত হয় এই গুলীচালনা। আন্তঃৰাষ্ট্ৰীয় সংবাদ সংস্থাৰ প্ৰতিবেদন অনুসৰি এই আক্ৰমণত তিনিজন লোক আহত হৈছে।
ঘটনা সন্দৰ্ভত আৰক্ষীয়ে এজন লোকক গ্ৰেপ্তাৰ কৰিছে। আনহাতে দ্বিতীয়গৰাকী গুলীচালনাকাৰীয়ে ঘটনাস্থলৰ আশে পাশে কোনো অঞ্চলত লুকুৱাই থকা বুলি জানিবলৈ দিয়ে আৰক্ষীয়ে। দ্বিতীয়গৰাকী দুৰ্বৃত্তক কৰায়ত্ত কৰিবলৈ আৰক্ষীয়ে হেলিকপ্টাৰ ব্যৱহাৰ কৰিছে।
চলিত বৰ্ষৰ জানুৱাৰী মাহৰ শেষৰ ফালে হুছেইন আক্কুৰ্টৰ বিচাৰ আৰম্ভ হৈছিল আৰু এই গোচৰৰ সৈতে জড়িত সকলোৰে সুৰক্ষা নিশ্চিত কৰিবলৈ কঠোৰ নিৰাপত্তা ব্যৱস্থা গ্ৰহণ কৰা হৈছিল। এই আক্ৰমণৰ পিছত আদালতত প্ৰৱেশ কৰা প্ৰতিজন ব্যক্তিৰ ওপৰত পুংখানুপুংখভাৱে তালাচী চলোৱা হয়।
পেছাদাৰী বক্সাৰ বেছাৰ নিমানীক গুলীয়াই হত্যা কৰাৰ অভিযোগত অভিযুক্ত হুছেইন আক্কুৰ্ট (৩৮)ৰ বিচাৰ আজি পুৱা আৰম্ভ হয়। ২০২৪ চনৰ জুলাই মাহত বেলজিয়াম আৰক্ষীৰ সহায়ত ব্ৰাছেলছৰ পৰা গ্ৰেপ্তাৰ কৰা হৈছিল তেওঁক। এই গোচৰৰ দ্বিতীয়জন সন্দেহযুক্ত আয়মান দাউদ কিৰিট এতিয়াও পলাতক হৈ আছে।
উল্লেখ্য যে, ২০২৩ চনৰ মাৰ্চ মাহত বক্সাৰ বেছাৰ নিমানীক হত্যা কৰা হৈছিল। কোৱা হৈছে যে তেওঁৰ হত্যাকাণ্ডত আণ্ডাৰৱৰ্ল্ড জড়িত হৈ আছে।
১৯৯৭ চনত ক’ছ’ভ’ যুদ্ধৰ সময়ত জাৰ্মানীত আশ্ৰয় লৈছিল বক্সাৰ বেছাৰ নিমানীয়ে। তেওঁৰ বক্সিং কেৰিয়াৰ আছিল অতি চমকপ্ৰদ। কেৰিয়াৰৰ ২৭খন মেচৰ ভিতৰত ২৬খন খেলত জয়লাভ কৰা নিমানীয়ে ২০১৯ চনত পেছাদাৰী বক্সিঙৰ পৰা অৱসৰ গ্ৰহণ কৰে।
