আমেৰিকাৰ ৰাষ্ট্ৰপতি ড’নাল্ড ট্ৰাম্পে আন এটা বিতৰ্কিত সিদ্ধান্ত গ্ৰহণ কৰি বিশ্বৰ ৬০ খন দেশৰ ওফৰত ‘প্ৰত্যুত্তৰমূলক শুল্ক’ আৰোপ কৰি সমগ্ৰ বিশ্বৰে অৰ্থনীতিলৈ ভাবুকি কঢ়িয়াই আনিছে।
ট্ৰাম্পে আৰম্ভ কৰা এই শুল্ক যুদ্ধৰ ফলত আমেৰিকা, ইউৰোপৰ লগতে এছিয়াৰ অৰ্থনীতিত বেয়া প্ৰভাৱ পৰাৰ লগতে হোৰাহোৰে খহিছে বিশ্বৰ বিভিন্ন দেশৰ শ্বেয়াৰ মাৰ্কেট।
ট্ৰাম্পৰ এই ভয়ংকৰ সিদ্ধান্তৰ পিছতেই ভাৰতীয় বজাৰতো বিৰূপ প্ৰভাৱ পৰা পৰিলক্ষিত হয়। সোমবাৰে ছেনছেক্সৰ শ্বেয়াৰ ২,২২৭ পইণ্ট হ্ৰাস পাই ৭৩,১৩৭.৯০ পইণ্টত বন্ধ হোৱাৰ বিপৰীতে নিফটিৰ শ্বেয়াৰ ৭৪৩ পইণ্ট হ্ৰাস পাই ২২,১৬১.৬০ পইণ্টত উপনীত হয়।
দিনটোৰ ব্যৱসায়ৰ সময়ছোৱাত দুয়োটা ইণ্ডেক্স প্ৰায় ৫ শতাংশ হ্ৰাস পাইছিল যদিও শেষত কিছু উন্নতি ঘটিছিল।
টাটা ষ্টীল (-৭.৭৮ শতাংশ), এল এণ্ড টি (-৫.৮৮ শতাংশ), টাটা মটৰ্ছ (-৫.৫৬ শতাংশ)ৰ দৰে ডাঙৰ ডাঙৰ ষ্টক বেয়াকৈ লোকচানৰ সন্মুখীন হয়।
কেৱল এয়াই নহয় আজিৰ দিনটোত দেশৰ সবাটোকৈ ধনাঢ্য ব্যক্তি মুকেশ আম্বানী, গৌতম আদানী, জিন্দাল গ্ৰুপকে ধৰি আন বহু উদ্যোগপতি তথা ব্যৱসায়ীয়ে হাজাৰ-হাজাৰ কোটি টকাৰ লোকচানৰ সন্মুখীন হয়।
বিদেশী মাৰ্কেটটো পৰিল প্ৰভাৱ
জাপানৰ নিকেই ২২৫ ৭.১ শতাংশ হ্ৰাস। বিগত কেইবাবছৰৰ ভিতৰত এইটোৱেই সৰ্বাধিক পতন
দক্ষিণ কোৰিয়াৰ কস্পি ৫.৫ শতাংশ হ্ৰাস পোৱাৰ বাবে চাৰ্কিট ব্ৰেকাৰ প্ৰয়োগ কৰিবলগীয়া হয়
টাইৱানৰ বজাৰ ৯.৮ শতাংশ হ্ৰাস পায়, যাৰ বাবে শ্বৰ্ট চেলিং নিষিদ্ধ কৰিবলগীয়া হৈছিল।
ছিংগাপুৰত বজাৰ মুকলি হোৱাৰ লগে লগে ৮.৫ শতাংশ হ্ৰাস পায়।
অষ্ট্ৰেলিয়াৰ এ এছ এক্স ২০০ ৬.৩ শতাংশ হ্ৰাস পায়। এয়া ১৫ মাহৰ ভিতৰত সৰ্বাধিক পতন।
ছৌদি শ্বেয়াৰ বজাৰত ৬.৭৮ শতাংশ হ্ৰাস পাইছে। ক’ভিডৰ পিছত এইটোৱে সৰ্ববৃহত পতন।
ইফালে বজাৰ খোলাৰ লগে লগে পাকিস্তান মাৰ্কেটত এক হাহাকাৰময় পৰিৱেশৰ সৃষ্টি হয়। পলকতে ৮০০০ পইণ্ট হ্ৰাস পোৱাৰ লগে লগে দেশখনে এঘণ্টাৰ বাবে শ্বেয়াৰ মাৰ্কেট বন্ধ কৰি দিবলৈ বাধ্য হয়।
