৬ ডিচেম্বৰত গোৱাৰ অৰপোৰা অঞ্চলত সংঘটিত হোৱা বৃহৎ অগ্নিকাণ্ডৰ এটা নতুন ভিডিঅ’ সামাজিক মাধ্যমত দ্ৰুতগতিত বিয়পি পৰিছে। ভিডিঅ’টোত এগৰাকী মহিলা নৃত্যশিল্পীয়ে জনপ্ৰিয় গীত “মেহবুবা”ত নৃত্য কৰি আছিল। পৰিৱেশটো উত্তেজনাৰে ভৰি আছিল যদিও কিছু মুহূৰ্তৰ ভিতৰতে পৰিস্থিতি সলনি হৈ যায়।
হঠাতে ক্লাবৰ চিলিঙৰ পৰা উজ্জ্বল স্ফুলিংগ সৰিবলৈ ধৰিলে আৰু মঞ্চৰ পিছফালে জুইৰ সৃষ্টি হয়। কেইছেকেণ্ডমানৰ ভিতৰতে গোটেই নাইট ক্লাৱটো ধোঁৱাৰে বিয়পি পৰে। উপস্থিত সকলোৱে নিৰাপত্তাৰ বাবে ইফালে-সিফালে দৌৰিবলৈ ধৰে। উপস্থিত থকা সকলৰ মতে, বাহিৰ ওলোৱা পথ অতি সংকীৰ্ণ হোৱাৰ বাবে বহু লোক সেই ঠাইত আৱদ্ধ হৈ সময়মতে পলায়ন কৰিব নোৱাৰিলে।
ঘটনাৰ প্ৰাৰম্ভিক তদন্তত ক্লাবত এটা বৃহৎ গেছ চিলিণ্ডাৰ বিস্ফোৰণ হোৱা বুলি জানিব পৰা গৈছে। বিস্ফোৰণ ইমানেই প্ৰবল আছিল যে লগে লগে মূল মহলা আৰু বেছমেণ্টলৈ জুই বিয়পি পৰে। কিছুমান প্ৰত্যক্ষদৰ্শীয়ে জনোৱা মতে, প্ৰথমে ওপৰৰ মহলাত ধোঁৱা দেখা গৈছিল, তাৰ পিছত হঠাতে সমগ্ৰ মহলাত জুইৰ শিখা বিয়পি পৰে। ইফালে আৰক্ষীয়ে নাইট ক্লাবৰ মেনেজাৰজনক গ্ৰেপ্তাৰ কৰি জেৰা অব্যাহত ৰাখিছে।
বৰ্তমানলৈ এই দুৰ্ঘটনাটোত মৃত্যু হোৱা লোকৰ সংখ্যা ২৫ জনলৈ বৃদ্ধি পাইছে। ধোঁৱা উশাহ বন্ধ হৈ লোৱাৰ মৃত্যু হোৱাৰ বিপৰীতে ৩ জন পোনপটীয়াকৈ জুইত আৱদ্ধ হৈ পৰে। ঘটনাৰ সময়ত ক্লাবটোৰ বাবে বিশেষ নৃত্য প্ৰদৰ্শনৰ দিন ধাৰ্য কৰা হৈছিল, য’ত ব্যাপক জনসমাগম হৈছিল।
গোৱাৰ মুখ্যমন্ত্ৰী প্ৰমোদ সাৱন্তই ঘটনাস্থলীত উপস্থিত হৈ পৰিস্থিতিৰ বুজ লয় আৰু মৃতকৰ বাবে গভীৰ শোক প্ৰকাশ কৰে। তেওঁ উল্লেখ কৰে যে, এইটো গোৱাত সংঘটিত হোৱা অন্যতম ভয়াৱহ ঘটনা আৰু দায়ীসকলক ৰেহাই দিয়া নহ’ব। মুখ্যমন্ত্রীয়ে উল্লেখ কৰে যে নাইট ক্লাবটোৱে কেইবাটাও সুৰক্ষাৰ মানদণ্ড মানি চলাত ব্যৰ্থ হৈছে, যাৰ বাবেই এই অগ্নিকাণ্ড ইমান দ্ৰুতগতিত বিয়পি পৰে।
তেওঁ দণ্ডাধীশৰ তদন্তৰ নিৰ্দেশ দি কয় যে, ৰাজ্যৰ সকলো ক্লাব আৰু বাৰৰ অগ্নিনিৰ্বাপক অডিট পুনৰ সম্পন্ন কৰা হ’ব। মৃতকৰ পৰিয়ালক চৰকাৰে সাহায্য প্ৰদান কৰাৰ বিপৰীতে আহত ছয়জন লোক চিকিৎসাধীন হৈ আছে।
