শনিবাৰে নিশা গোৱালপাৰা জিলাত নিৰাপত্তাৰক্ষীৰ সৈতে হোৱা সংঘৰ্ষত চাৰিজন দুৰ্ধৰ্ষ ডকাইত নিহত হয়। জিলাখনৰ ধূপধৰাৰ ঘিলাডুবিত সংঘটিত হৈছে এই ঘটনা। খবৰ অনুসৰি দুয়ো পক্ষৰ মাজত চলা গুলীয়াগুলীৰ সময়তে মৃত্যু হয় ডকাইত চাৰিজনৰ।
লাভ কৰা খবৰ অনুসৰি, শনিবাৰে নিশা এগৰাকী ব্যৱসায়ীক অপহৰণৰ উদ্দেশ্যে ডকাইতৰ দলটোৱে অসম-মেঘালয় সীমান্তৱৰ্তী অঞ্চলত বাহৰ পাতি আছিল। নিৰ্ভৰযোগ্য সূত্ৰৰ পৰা এই খবৰ লাভ কৰাৰ পিছতেই ঘটনাস্থলত উপস্থিত হয় নিৰাপত্তাৰক্ষীৰ এটা দল।
এছএছপি নৱনীত মহন্তৰ নেতৃত্বত যোৱা নিৰাপত্তাৰক্ষীৰ দলটোৰ উপস্থিতিৰ কথা জানিব পৰাৰ লগে লগে অস্ত্ৰধাৰী ডকাইতৰ দলটোৱে আৰক্ষীক আক্ৰমণ কৰি ঘটনাস্থলৰ পৰা পলায়নৰ চেষ্টা চলায়। লগে লগে আৰক্ষীয়েও ডকাইতৰ দলটোলৈ গুলীচালনা কৰে।
আৰক্ষী আৰু ডকাইতৰ মাজত হোৱা গুলীচালনাৰ ঘটনাত চাৰিজনকৈ দুৰ্ধৰ্ষ ডকাইতৰ মৃত্যু হোৱা বুলি আৰক্ষীয়ে নিশ্চিত কৰে। নিহত ডকাইত কেইজনক মুকুন্দ ৰাভা, চুবুৰ আলী, জাহিদুল ইছলাম আৰু চেংবাত মাৰাক বুলি চিনাক্ত কৰিছে।
এই ডকাইতৰ দলটোৰ বাহনখনৰ পৰা চাৰিটাকৈ পিষ্টল উদ্ধাৰ কৰিছে নিৰাপত্তাৰক্ষীৰ দলটোৱে। স্থানীয় লোকৰ ভাষ্য অনুসৰি এই ডকাইতৰ দলটোৱে দীৰ্ঘদিনৰ পৰা অঞ্চলটোত সন্ত্ৰাসৰ সৃষ্টি কৰি আহিছিল।
সম্প্ৰতি অঞ্চলটোত নিৰাপত্তাৰক্ষীৰ এটা বৃহত দলে তহল দি থকাৰ লগতে তালাচী অভিযানো অব্যাহত ৰাখিছে।
