কেন্দ্ৰীয় সংখ্যালঘু পৰিক্ৰমা মন্ত্ৰী কিৰেন ৰিজিজুৱে শেহতীয়াকৈ এইবাৰৰ হজ তীৰ্থযাত্ৰাৰ সময়ত প্ৰাণ হেৰুওৱা লোকৰ তথ্য দিছে। তেওঁ জনাইছে যে, এইবাৰ হজৰ সময়ত ২০৮ জন ভাৰতীয় হজযাত্ৰীয়ে প্ৰাণ হেৰুৱাইছে।
ৰাজ্যসভাত উত্থাপিত এক প্ৰশ্নৰ উত্তৰত এই তথ্য দিয়া হৈছে। য’ত এইবাৰৰ হজ যাত্ৰাৰ সময়ত সন্মুখীন হোৱা সমস্যাসমূহৰ ওপৰতো তথ্য দিয়া হৈছে।
এইবাৰ হজৰ সময়ত যাত্ৰীসকলে বহুতো সমস্যাৰ সন্মুখীন হ’বলগীয়া হৈছিল। ১৪ জুনৰ পৰা ১৯ জুনলৈ অনুষ্ঠিত হোৱা ২০২৪ চনৰ হজ তীৰ্থযাত্ৰাৰ সময়ত উষ্ণতা ৫০ ডিগ্ৰী চেলছিয়াছৰ ওপৰলৈ গৈছিল। যাৰ ফলত ভাৰতকে ধৰি বহু দেশৰ লোকৰ প্ৰাণহানি হয়।
অতি উত্তাপে বহু তীৰ্থযাত্ৰীৰ স্বাস্থ্যত বিৰূপ প্ৰভাৱ পেলাইছিল, যাৰ ফলত বিভিন্ন দেশৰ পৰা অহা প্ৰায় ১৮ লাখ অংশগ্ৰহণকাৰীৰ ভিতৰত ১৩০১ জনৰ প্ৰাণহানি হৈছিল। এই মৃত্যুৰ অধিকাংশই হিট ষ্ট্ৰ’ক আৰু ডিহাইড্ৰেচনৰ ফলত হৈছিল। মন কৰিবলগীয়া কথাটো হ’ল যে, প্ৰাণ হেৰুওৱা লোকসকলৰ ভিতৰত ৭০ শতাংশতকৈ অধিক লোকৰ বয়স ৬০ বছৰ বা তাতকৈ অধিক।
খবৰ অনুসৰি, ১৮ লাখ তীৰ্থযাত্ৰীয়ে হজত অংশ লৈছিল, যিটো হজত যোৱা দশকবোৰত ৰেকৰ্ড কৰা সৰ্বোচ্চ উষ্ণতাৰ সন্মুখীন হৈছিল। অত্যাধিক গৰমৰ বাবে বহু স্বাস্থ্যজনিত সমস্যাৰো সৃষ্টি হৈছিল, হজ যাত্ৰাৰ সময়ত এদিনতে ২৭০০ৰো অধিক লোক গৰমৰ বাবে অসুস্থ হোৱাৰ ঘটনা পোহৰলৈ আহিছিল।
