অন্ত পৰাৰ পৰিৱৰ্তে অধিক তীব্ৰতৰ হৈ পৰিছে ইজৰাইল আৰু হামাছৰ যুদ্ধ। দুয়ো পক্ষৰ মাজত চলি থকা যুদ্ধৰ মাজতে এইবাৰ হামাছ সমৰ্থিত সন্ত্ৰাসবাদী সংগঠন হিজবুল্লাহে ইজৰাইলত ভয়ংকৰ আক্ৰমণ সংঘটিত কৰিছে।
ৰকেটৰ জৰিয়তে কৰা আক্ৰমণত ইজৰাইলৰ শিশু-কিশোৰসহ ১২ জনৰ মৃত্যু হয়। মৃতসকলৰ অধিকাংশই শিশু বুলি জানিব পৰা গৈছে।
আন্তঃৰাষ্ট্ৰীয় সংবাদ মাধ্যমৰ খবৰ অনুসৰি, সন্ত্ৰাসবাদী সংগঠন হিজবুল্লাহে শনিবাৰে ইজৰাইলৰ মাজদল ছামছৰ ফুটবল খেলপথাৰত ৰকেটৰে আক্ৰমণ চলায়। আক্ৰমণ ইমানেই তীব্ৰতৰ তথা ভয়ংকৰ আছিল যে খেলপথাৰত থকা কোনো লোকেই নিৰাপদ স্থানত আশ্ৰয় লোৱাৰ সুযোগ লাভ নকৰিলে।
এই আক্ৰমণৰ ফলত খেলপথাৰত খেলি থকা বৃহৎ সংখ্যক লোক হতাহত হয়। এই আক্ৰমণৰ বলি হোৱা শিশুৰ সংখ্যা অতি বেছি বুলি জানিব পৰা গৈছে।
ইজৰাইলৰ সংবাদ মাধ্যমৰ খবৰ অনুসৰি, লেবাননত থকা সন্ত্ৰাসবাদী সংগঠন হিজবু্ল্লাহে এই ভয়ংকৰ আক্ৰমণৰ ঘটনাটো সংঘটিত কৰিছে। এই ঘটনাত ১২টি শিশু-কিশোৰৰ মৃত্যু হোৱাৰ লগতে বহু লোক গুৰুতৰভাৱে আহত হৈছে।
উল্লেখ্য যে বিগত বৰ্ষত ইজৰাইল আৰু হামাছৰ মাজত আৰম্ভ হোৱা যুদ্ধৰ পিছত ইজৰাইলত হিজবুল্লাহৰ এইটোৱে সবাটোকৈ ভয়ংকৰ আক্ৰমণৰ ঘটনা বুলি অভিহিত কৰা হৈছে।
ইফালে হিজবুল্লাহৰ এই ভয়ংকৰ আক্ৰমণৰ প্ৰতিশোধস্বৰূপে ইজৰাইলৰ সেনাইও যে ভয়ংকৰ আক্ৰমণ সংঘটিত কৰিব সেই কথা ইতিমধ্যেই ইংগিত প্ৰদান কৰিছে ইজৰাইলৰ প্ৰধানমন্ত্ৰীয়ে।
