বিগত কিছু দিনৰ পৰা হৈ থকা নেৰানেপেৰা বৰষুণৰ ফলত হিমাচল প্ৰদেশত সাধাৰণ জনতাৰ স্বাভাৱিক জনজীৱন ব্যাহত হৈ পৰিছে। ৰাজ্যিক জৰুৰীকালীন অভিযান কেন্দ্ৰই প্ৰকাশ কৰা তথ্য অনুসৰি ৰাজ্যখনত ২০ জুনৰ পৰা ২৭ জুনলৈ হোৱা ধাৰাসাৰ বৰষুণ, ভূমিস্খলন তথা ডাৱৰ বিস্ফোৰণৰ ফলত ৩১ গৰাকী লোকৰ মৃত্যু হোৱাৰ লগতে ৪ গৰাকী সন্ধানহীন হৈ আছে আৰু প্ৰায় ৬৬ গৰাকী লোক আহত হৈছে।
প্ৰচণ্ড বৰষুণৰ বাবে ৰাজ্যখনে মাত্ৰ এসপ্তাহতে ২৯.১৬ কোটি টকাৰ লোকচানৰ সন্মুখীন হৈছে। সৰ্বাধিক ২ কোটি ৭৪৩.৪০ লাখ টকাৰ লোকচানৰ সন্মুখীন হৈছে লোক নিৰ্মাণ বিভাগ। আনহাতে এই সময়ছোৱাত ৬টা ঘৰ সম্পূৰ্ণৰূপে ধ্বংস হোৱাৰ লগতে ৮টা ঘৰ ক্ষতিগ্ৰস্ত হৈছে। ইয়াৰ উপৰি পশু ধনৰো যথেষ্ট ক্ষতিসাধন হৈছে।
প্ৰকৃতিৰ ধ্বংসলীলাত ৰাজ্যখনৰ ৫৩টা পথত যাতায়াত বন্ধ হৈ পৰিছে। ইয়াৰ উপৰি ১৩৫টাৰো অধিক বৈদ্যুতিক ট্ৰেন্সফৰ্মাৰ বিকল হোৱা আৰু কেইবাটাও পানী যোগান আঁচনি বন্ধ হৈ পৰাত ব্যাপক অসুবিধাৰ সন্মুখীন হৈছে জনসাধাৰণ।
ৰাজ্যখনত সৰ্বাধিক ক্ষতিগ্ৰস্ত হোৱা জিলাখন হৈছে কুল্লু জিলা, য’ত ২৩টা পথ সম্পূৰ্ণৰূপে বন্ধ হৈ পৰিছে।
বতৰ বিজ্ঞান বিভাগে ৩ জুলাইলৈকে প্ৰচণ্ড বৰষুণৰ পূৰ্বাভাস প্ৰকাশ কৰিছে। প্ৰবল বৰষুণৰ সম্ভাৱনাৰ প্ৰতি লক্ষ্য ৰাখি বিশেষকৈ ২৯ জুনত অৰেঞ্জ এলাৰ্ট ঘোষণা কৰা হৈছে।
আগন্তুক ২৪ ঘণ্টাৰ ভিতৰত শিমলা আৰু ছিৰমৌৰ জিলাত বানপানীৰ সতৰ্কবাণী জাৰি কৰি নদী আৰু আন আন জলাশয়ৰ পৰা আঁতৰি থাকিবলৈ আৰু সাৱধান হ’বলৈ পৰামৰ্শ দিয়া হৈছে।
