অহা ৫ ফেব্ৰুৱাৰীত অনুষ্ঠিত হ’বলগীয়া দিল্লী বিধানসভা নিৰ্বাচনৰ বাবে তুংগত উঠিছে প্ৰচাৰ অভিযান। আপ নেতৃত্বাধীন চৰকাৰক ওফৰাবলৈ এইবাৰ বিজেপিয়ে ধাৰণ কৰিছে আগ্ৰাসী ৰূপ। প্ৰধানমন্ত্ৰী মোদীকে ধৰি বিজেপিৰ কেইবাজনো জ্যেষ্ঠ নেতাৰ লগতে এইবাৰ প্ৰচাৰত দখা পোৱা গ’ল অসমৰ মুখ্যমন্ত্ৰী ড০ হিমন্ত বিশ্ব শৰ্মাক।
মুখ্যমন্ত্ৰী হিমন্ত বিশ্ব শৰ্মাই আজি দিল্লীৰ উত্তম নগৰ আৰু কৰোলবাগ বিধান সভাত দুখন নিৰ্বাচনী জনসভা সম্বোধন কৰে। মুখ্যমন্ত্ৰী শৰ্মাই কেজৰিৱালক সমালোচনা কৰি কয় যে এই অঞ্চল দুটাৰ পৰা অন্যান্য স্থানসমূহলৈ যাতায়াত কৰাটো অত্যন্ত বিপজ্জনক। এই অঞ্চলৰ পথৰ সৈতে গুৱাহাটীৰ বাট-পথৰ তুলনা কৰাটো অতি হাস্যকৰ বুলিও আখ্যা দিয়ে।
দিল্লী চৰকাৰক ক্ষুৰধাৰ আক্ৰমণ কৰি ড০ শৰ্মাই প্ৰতিটো ক্ষেত্ৰতে চৰকাৰৰ বিফলতাৰ খতিয়ান দাঙি ধৰি অনুন্নত পথ, দূষিত বায়ু, সুৰা কেলেংকাৰি, চিকিৎসালয়ৰ দুৰ্বল আন্তঃগাঁথনি আৰু আইন শৃংখলাৰ কথা ব্যক্ত কৰে।
আনহাতে দিল্লীৰ বৰ্তমানৰ মুখ্যমন্ত্ৰী আতিশীক ক্ষমতাহীন তথা মাত্ৰ নামৰ মুখ্যমন্ত্ৰী বুলি উল্লেখ কৰি ড০ শৰ্মাই দিল্লীৰ প্ৰাক্তন মুখ্যমন্ত্ৰী অৰবিন্দ কেজৰিৱালক তীব্ৰ সমালোচনা কৰি কয় যে কাৰাগাৰত থকাৰ অৱস্থাৰ পৰা ৰিম’ট কন্ট্ৰ’ল ৰাজনীতি কৰি জনসধাৰণক প্ৰতাৰণা কৰিছিল কেজৰিৱালে।
মুখ্যমন্ত্ৰী শৰ্মাই লগতে কেজৰিৱালৰ বিতৰ্কিত বাসগৃহ চিচ মহল সম্পৰ্কতো ব্যংগাত্মকভাৱে কটাক্ষ কৰে। আগন্তুক নিৰ্বাচনত দিল্লীৰ জনতাক বিজেপিৰ পক্ষত ভোট দি আপ নেতৃত্বাধীন চৰকাৰক শাসনৰ পৰা ওফৰাবলৈ আহ্বান জনায়।
