সমাগত বি টি চি নিৰ্বাচনক লৈ বড়োলেণ্ডত আৰম্ভ হৈছে ব্যাপক তৎপৰতা। বি টি চিৰ শাসনভাৰ দখল কৰাৰ বাবে প্ৰতিটো ৰাজনৈতিক দলে তৃণমূল পৰ্যায়ৰ পৰা আৰম্ভ কৰিছে প্ৰস্তুতি। বিধানসভা নিৰ্বাচনৰ পূৰ্বে হ’বলগীয়া এই বি টি চি নিৰ্বাচনক লৈ এতিয়া বিশেষ দৃষ্টি নিৱদ্ধ হৈ আছে ৰাজ্যবাসীৰ।
শেহতীয়াকৈ অনুষ্ঠিত হৈ যোৱা পঞ্চায়ত নিৰ্বাচনত বিজেপিয়ে আঞ্চলিক দল অগপৰ সৈতে মিত্ৰতা কৰিছিল যদিও এইবাৰ মিত্ৰতা অবিহনেই বি টি চি নিৰ্বাচনত অৱতীৰ্ণ হ’ব বিজেপি। বিজেপিয়ে কোনো দলৰ সৈতে মিত্ৰতা নকৰে বুলি পুনৰবাৰ স্পষ্ট কৰি দিলে মুখ্যমন্ত্ৰী হিমন্ত বিশ্ব শৰ্মাই।
আজি দৰঙত সংবাদ মাধ্যমৰ আগত মুখ্যমন্ত্ৰী শৰ্মাই কয়, ‘মিত্ৰতা অবিহনেই সমাগত বিটিচি নিৰ্বাচনত অৱতীৰ্ণ হ’ব বিজেপি। দিল্লী-দিশপুৰত মিত্ৰতা থাকিলেও কোকৰাঝাৰত কোনো ধৰণৰ মিত্ৰতা নহয়।’
মুখ্যমন্ত্ৰী শৰ্মাই লগতে কয় যে ৰাজনৈতিক মিত্ৰতাৰ ক্ষেত্ৰত কোনো ধৰণৰ আলোচনা হোৱা নাই আৰু যদি এই সন্দৰ্ভত কিবা আলোচনা হয়ো তেন্তে সেয়া বি টি চি নিৰ্বাচনৰ পিছতহে হ’ব।
ইফালে মিত্ৰদল ইউ পি পি এলৰ সৈতে নিৰ্বাচনী মিত্ৰতা নহ’লেও দলটোৰ সৈতে বিজপিয়ে কোনোধৰণৰ সংঘাতত লিপ্ত নহয় বুলিও স্পষ্ট কৰি দিয়ে মুখ্যমন্ত্ৰী শৰ্মাই।
উল্লেখ্য যে, চলিত বছৰৰ ছেপ্তেম্বৰ মাহত অনুষ্ঠিত হ’বলগীয়া ৪০খন আসনযুক্ত বি টি চি নিৰ্বাচনত ইউ পি পি এল, বিজেপি, বি পি এফ, অগপকে ধৰি আন কেইবাটাও ৰাজনৈতিক দলে অকলেই নিৰ্বাচনত অৱতীৰ্ণ হ’ব।
বিজেপিয়ে ২৬ৰ পৰা ২৮ খন আসনত প্ৰতিদ্বন্দ্বিতা কৰাৰ বিপৰীতে অগপই ১০ খন আসনত প্ৰতিদ্বন্দ্বিতা কৰিব বুলি চলিছে চৰ্চা। স্মৰ্তব্য যে নিৰ্বাচনৰ পিছত বিজেপিয়ে যিকোনো দলৰ সৈতেই মিত্ৰতা কৰিব পাৰে বুলিও ইংগিত দি থৈছে। অৰ্থাত ইউ পি পি এলৰ সমান্তৰালকৈ বি পি এফৰ সৈতে মিলিও বি টি চি দখল কৰিব পাৰে বিজেপিয়ে।
