২০৩৬ চনৰ অলিম্পিক আয়োজন কৰিবলৈ তপৰহৈ পৰিছে ভাৰত। ইতিমধ্যে চলিত বৰ্ষৰ আগষ্ট মাহত প্ৰধানমন্ত্ৰী নৰেন্দ্ৰ মোদীয়ে ২০৩৬ চনৰ অলিম্পিকৰ বাবে ভাৰতে প্ৰস্তুতি আৰম্ভ কৰিছে বুলি মন্তব্য কৰিছিল।
সংবাদ মাধ্যমৰ বাতৰি অনুসৰি ভাৰতীয় অলিম্পিক সন্থাই আন্তঃৰাষ্ট্ৰীয় অলিম্পিক সমিতিলৈ পত্ৰ লিখি ২০৩৬ চনৰ অলিম্পিক আয়োজনৰ দাবী উত্থাপন কৰিছে।
এতিয়া প্ৰশ্ন উত্থাপন হৈছে যে যদি ভাৰতে আয়োজনৰ দায়িত্ব লাভ কৰে তেন্তে কিমান খৰচ হ’ব?
উল্লেখ্য যে ২০১০ চনত যেতিয়া ভাৰতে কমনৱেলথ গেমছ আয়োজন কৰিছিল তেতিয়া মুঠ ব্যয় আছিল ১.৪ বিলিয়ন মাৰ্কিন ডলাৰ অৰ্থাৎ ভাৰতীয় মুদ্ৰাত প্ৰায় ১২,৬১৭ কোটি টকা। কিন্তু কোৱা হয় যে গেমছৰ প্ৰকৃত বাজেট ইয়াতকৈ বহু বেছি আছিল, প্ৰায় ৭০ হাজাৰ কোটি টকা, য’ত আন্তঃগাঁথনি আৰু দিল্লী মেট্ৰ’ৰ সম্প্ৰসাৰণকে ধৰি বহু কাম অন্তৰ্ভুক্ত কৰা হৈছিল।
কমনৱেলথ গেমছত মুঠ ৭২খন দেশ আৰু আন ১৮খন সৰু দেশে অংশগ্ৰহণ কৰে, কিন্তু গ্ৰেটেষ্ট শ্ব’ অন দ্যা আৰ্থৰূপে পৰিচিত অলিম্পিক গেমছ বৃহৎ পৰিসৰত আয়োজন কৰা হয়।
মাত্ৰ কেইমাহমানৰ পূৰ্বে সমাপ্ত হোৱা পেৰিছ অলিম্পিক ২০২৪ৰ যদি উদাহৰণ লও তেন্তে আমি দেখিবলৈ পাও যে তাত খেলসমূহৰ আয়োজনৰ বাবে মুঠ ৯ বিলিয়ন মাৰ্কিন ডলাৰ ব্যয় কৰা হৈছিল। ভাৰতীয় মুদ্ৰাত এই ধনৰাশি প্ৰায় ৭৫,৭০৫ কোটি টকাৰ সমতুল্য।
যদি আমি তথ্য বিশ্লেষণ কৰো তেন্তে ফ্ৰান্সে পেৰিছে অলিম্পিক গেমছ অতি সস্তাতে আয়োজন কৰিছিল, কিন্তু তাৰ পূৰ্বৰ অলিম্পিক গেমছ আয়োজন কৰা দেশসমূহে ইয়াতকৈ বহু বেছি পৰিমাণৰ ধন খৰচ কৰিছিল।
২০০৮ চনত চীনত অনুষ্ঠিত হোৱা গেমছক ইতিহাসত এতিয়ালৈকে সৰ্বাধিক ব্যয়বহুল অলিম্পিক গেমছ হিচাপে বিবেচিত হৈছে। ২০০৮ চনৰ বেইজিং অলিম্পিকৰ বাবে প্ৰায় ৬.৮ বিলিয়ন মাৰ্কিন ডলাৰ ব্যয় হৈছিল যদিও ইয়াৰ ভিতৰত বেইজিং সংস্কাৰৰ বাবে ব্যৱহাৰ কৰা কেইবা হাজাৰ কোটি টকা অন্তৰ্ভুক্ত নহয়। এক্সপ্ৰেছৱে, ৰে’লৰ সুবিধা আৰু আন্তঃগাঁথনি সম্পৰ্কীয় কামত ব্যয় কৰা ধনকে ধৰি ২০০৮ চনৰ অলিম্পিক গেমছৰ বাবে মুঠ ৪৩ বিলিয়ন মাৰ্কিন ডলাৰ ব্যয় কৰা হৈছিল। এই ধনৰাশি ভাৰতীয় মুদ্ৰাত ৩ লাখ ৬১ হাজাৰ ৭০৩ কোটি টকাৰ সমান।
এতিয়া প্ৰশ্ন হৈছে যদিহে ২০৩৬ চনৰ অলিম্পিক আয়োজনৰ দায়িত্ব লাভ কৰে তেন্তে ভাৰতে অৰ্থনৈতিক দিশটোৰ সৈতে কিদৰে মোকাবিলা কৰে সেয়া লক্ষ্যণীয় হ’ব।
