বাবৰি মছজিদ ধ্বংসৰ ৩৩ বছৰ উপলক্ষে বাবৰি মছজিদক কেন্দ্ৰ কৰি পুনৰবাৰ দেশত তীব্ৰতৰ হৈ পৰিছে ৰাজনীতি। পশ্চিমবংগত বাবৰি মছজিদৰ আধাৰশিলা স্থাপন কৰে নিলম্বিত তৃণমূল কংগ্ৰেছৰ বিধায়ক হুমায়ুন কবীৰে।
ইফালে আকৌ তেলেংগানাৰ বাবৰি মছজিদৰ স্মৃতিসৌধ নিৰ্মাণৰ কথা ঘোষণা কৰিছে হায়দৰাবাদত থকা তেহৰিক মুছলিম শ্বাব্বান নামৰ এটা সংগঠনে।
৩৩ বছৰ উপলক্ষে হায়দৰাবাদত এখন ৰাজহুৱা সভা অনুষ্ঠিত হৈছিল। এই বৈঠকত মুছলিম শ্বাব্বানৰ সভাপতি মুস্তাক মালিকে কয় যে, কল্যাণমূলক প্ৰতিষ্ঠানৰ লগতে বৃহত্তৰ হায়দৰাবাদত বাবৰি মছজিদৰ বাবে এটা স্মৃতিসৌধ নিৰ্মাণ কৰা হ’ব। তেওঁ কয় যে, তেওঁলোকে অতি সোনকালে এই স্মৃতিসৌধ কেনেকৈ আৰু কেতিয়া নিৰ্মাণ কৰা হ’ব সেই কথা ঘোষণা কৰিব।
মুস্তাক মালিকে লগতে কয় যে বাবৰৰ নামত কোনেও আতংকিত হ’ব নালাগে। তেওঁ উল্লেখ কৰে যে, অযোধ্যাত বাবৰি মছজিদ নিৰ্মাণৰ বাবে বাবৰে কোনো ধৰণৰ আৰ্থিক সাহায্য আগবঢ়োৱাৰ কোনো প্ৰমাণ পোৱা নাই। তেওঁ কয় যে সম্ভৱতঃ স্থানীয় এজন মানুহৰ নাম বাবৰ আৰু মছজিদটোৰ নাম তেওঁৰ নামেৰে ৰখা হৈছিল, কিন্তু একাংশই এনেয়েই এই বিষয়টোক ইছ্যু কৰি তুলিব বিচাৰিছে।
