মণিপুৰৰ হিংসাৰ বাবে ক্ষমা বিচাৰিছে মুখ্যমন্ত্ৰী এন বীৰেণ সিঙে। ২০২৪ বৰ্ষক তেওঁ দুৰ্ভাগ্যৰে ভৰা বুলি অভিহিত কৰিছে। ৰাজ্যখনত ৩ মে’ৰ পৰা আজিলৈকে যি ঘটনা সংঘটিত হৈছে তাৰ বাবে মুখ্যমন্ত্ৰীয়ে ৰাজ্যবাসীৰ ওচৰত ক্ষমা বিচাৰিছে।
তেওঁ কয়, ‘এই গোটেই বছৰটো অতি দুৰ্ভাগ্যজনক। মই অত্যন্ত দুখী আৰু যোৱা ৩ মে’ৰ পৰা আজিলৈকে যি সংঘটিত হৈছে তাৰ বাবে ৰাজ্যবাসীৰ ওচৰত ক্ষমা খুজিব বিচাৰিছো। বহুতে নিজৰ আপোনজনক হেৰুৱাইছে। বহুতে গৃহহীন হৈছে। মই সঁচাকৈয়ে এই বেদনা অনুভৱ কৰিছো। এতিয়া আশা কৰিছো যে ২০২৫ চনৰ নতুন বছৰ আৰম্ভ হোৱাৰ লগে লগে ৰাজ্যখনত স্বাভাৱিকতা আৰু শান্তি ঘূৰি আহিব। ৰাজ্যৰ সকলো জনগোষ্ঠীলৈ আহ্বান জনাব বিচাৰো যে যিয়েই নহওক কিয়, আমি সকলোৱে অতীতৰ ভুলবোৰ পাহৰি এক শান্তিপূৰ্ণ মণিপুৰৰ বাবে একেলগে নতুন জীৱন আৰম্ভ কৰিব লাগিব।’
মুখ্যমন্ত্ৰী এন বীৰেণ সিঙে লগতে কয়, ‘এতিয়ালৈকে মুঠতে প্ৰায় ২০০ জন লোক নিহত হৈছে আৰু প্ৰায় ১২,২৪৭ টা এফআইআৰ পঞ্জীয়ন কৰা হৈছে আৰু ৬২৫ জন অভিযুক্তক গ্ৰেপ্তাৰ কৰা হৈছে। প্ৰায় ৫,৬০০ টা বিস্ফোৰক সামগ্ৰী আৰু প্ৰায় ৩৫,০০০ গোলাবাৰুদ উদ্ধাৰ কৰা হৈছে। গৃহহীণ হোৱা লোকসকলক সহায় কৰাৰ বাবে কেন্দ্ৰীয় চৰকাৰে পৰ্যাপ্ত পৰিমাণৰ ধন যোগান ধৰিছে।
উল্লেখ্য যে, চলিত বৰ্ষৰ ৩ মে’ৰ পৰা মণিপুৰৰ দুই জনগোষ্ঠী মেইটেই আৰু কুকিৰ মাজত আৰম্ভ হৈছিল হিংসা। এই হিংসা নিমিষতে ভয়ংকৰ ৰূপ ধাৰণ কৰি ৰাজ্যৰ প্ৰতিটো প্ৰান্তত বিয়পি পৰে আৰু এই পৰ্যন্ত বহু লোক নিহত হোৱাৰ লগতে গৃহহীন হৈছে হাজাৰ-হাজাৰ লোক।
এই গোষ্ঠীগত সংঘৰ্ষ নিয়ন্ত্ৰণ কৰিবলৈ ৰাজ্য চৰকাৰ ব্যৰ্থ হোৱাত দেশবাসীৰ ক্ষুৰধাৰ সমালোচনাৰ সন্মুখীন হৈছিল এন বীৰেণ সিং।
