শনিবাৰে বিত্তমন্ত্ৰী নিৰ্মলা সীতাৰমণে ২০২৫-২৬ বৰ্ষৰ কেন্দ্ৰীয় বাজেট দাখিল কৰে। এই বাজেটত ৫০,৬৫,৩৪৫ কোটি টকা ব্যয়ৰ কল্পনা কৰা হৈছে। এই ধনৰাশি চলিত বিত্তীয় বৰ্ষতকৈ ৭.৪ শতাংশ অধিক।
বৈদেশিক পৰিক্ৰমা মন্ত্ৰালয়ে বিদেশলৈ সাহায্যৰ বাবে ৫৪৮৩ কোটি টকা আবণ্টন দিছে, যিটো যোৱা বছৰৰ তুলনাত কিছু কম। বৈদেশিক পৰিক্ৰমা মন্ত্ৰালয়ৰ মুঠ বাজেট ২০,৫১৬ কোটি টকা।
কোন দেশৰ বাবে কিমান আৱণ্টন
তালিকাৰ শীৰ্ষত আছে ভূটান
২০২৫-২৬ চনত ভাৰতে ভূটানক সৰ্বাধিক সহায় আগবঢ়াব। ভূটানে লাভ কৰিব ২১৫০ কোটি টকা। যোৱা বছৰৰ ২০৬৮ কোটিতকৈ অধিক।
মালদ্বীপ
মালদ্বীপৰ বাবে ভাৰতৰ আবণ্টন ৪০০ কোটিৰ পৰা ৬০০ কোটিলৈ বৃদ্ধি কৰা হৈছে। ৰাষ্ট্ৰপতি মহম্মদ মুইজ্জোৱে নিৰ্বাচনত জয় লাভ কৰাৰ পিছতে ভাৰতৰ সৈতে সম্পৰ্ক কিছু অৱনতি হৈছিল শেহতীয়াকৈ মালদ্বীপে নতুন দিল্লীৰ সৈতে সম্পৰ্ক উন্নত কৰাৰ প্ৰচেষ্টা অব্যাহত ৰাখিছে।
আফগানিস্তান
যোৱা বছৰ আফগানিস্তানক ২০০ কোটি টকাৰ সাহায্য দিয়া হৈছিল। কিন্তু ২০২৫-২৬ বৰ্ষত ১০০ কোটি টকালৈ হ্ৰাস কৰা হৈছে। দুবছৰ পূৰ্বে দিয়া ২০৭ কোটি টকাৰ তুলনাত এয়া বহু কম।
ম্যানমাৰলৈ সাহায্য বৃদ্ধি
২০২৫-২৬ বৰ্ষৰ বাবে ৩৫০ কোটি টকালৈ বৃদ্ধি কৰা হৈছে। ২০২৪-২৫ বৰ্ষত আছিল ২৫০ কোটি টকা। দেশত অব্যাহত থকা অস্থিৰতাৰ মাজতে এই বৃহত আৱণ্টনে নিশ্চিতভাৱে দেশখনক যথেষ্ট পৰিমানে সকাহ প্ৰদান কৰিব।
অন্য দেশলৈ আবণ্টন
ইফালে ভাৰতে নেপালৰ বাবে আবণ্টন দিছে ৭০০ কোটি টকা। সংকটগ্ৰস্ত প্ৰতিবেশী ৰাষ্ট্ৰ শ্ৰীলংকাৰ বাবে আবণ্টন ২৪৫ কোটিৰ পৰা ৩০০ কোটিলৈ বৃদ্ধি কৰা হৈছে। যোৱা বছৰ বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক পদচ্যুত কৰাৰ পিছত দুয়োখন দেশৰ মাজত আৰম্ভ হোৱা কূটনৈতিক মতানৈক্যৰ মাজতে ঢাকাক দিয়া সাহায্যৰ পৰিমাণ অপৰিৱৰ্তিত হৈ আছে অৰ্থাত ১২০ কোটি টকা।
