পেহেলগাম আক্ৰমণৰ প্ৰতিশোধ স্বৰূপে পিছতে ভাৰতৰ ফালৰ পৰা ২৩ এপ্ৰিলত সিন্ধু জল সন্ধি স্থগিত ৰখা হৈছিল। ইয়াৰ পিছতে পাকিস্তানে ভাৰতীয় বিমানৰ বাবে নিজৰ বিমানক্ষেত্ৰ অৰ্থাৎ এয়াৰস্পেচ বন্ধ কৰিছিল। ইয়াৰ বাবে পাকিস্তানে ১২৪০ কোটি টকাৰ লোকচানৰ সন্মুখীন হৈছিল।
৮ আগষ্টত পাকিস্তানৰ সংবাদ মাধ্যমে সদৰি কৰা অনুসৰি, পাকিস্তানে দুমাহতে ৪.১০ আৰৱ অৰ্থাৎ ১২৪০ কোটিৰ লোকচানৰ সন্মুখীন হৈছে। পাকিস্তানৰ ৰক্ষা মন্ত্ৰালয়ৰ অনুসৰি, এই লোকচান ২৪ এপ্ৰিলৰ পৰা ৩০ জুন ২০২৫ৰ ভিতৰত হৈছে। এই পদক্ষেপৰ দ্বাৰা দিনৌ ১০০ৰ পৰা ১৫০খন ভাৰতীয় বিমান প্ৰভাৱিত হৈছে।
ইফালে আকৌ পাকিস্তানৰ প্ৰতিৰক্ষা মন্ত্ৰালয়ে কয় যে, এই লোকচানৰ পিছতো ২০১৯ চনত পাকিস্তান বিমানবন্দৰ কৰ্তৃপক্ষৰ মুঠ ৰাজহ ৫০৮ হাজাৰ ডলাৰৰ পৰা ২০২৫ চনত ৭ লাখ ৬০ হাজাৰ ডলাৰলৈ বৃদ্ধি পাইছে। ৰক্ষা মন্ত্ৰালয়ে লগতে কয় যে, আকাশমাৰ্গৰ নিষেধাজ্ঞা ফেডাৰেল চৰকাৰৰ অধীনস্থ। উল্লেখ্য যে, ২০১৯ চনত সীমান্ত অতিক্ৰম কৰা উত্তেজনাৰ বাবে আকাশমাৰ্গ বন্ধ হোৱাৰ বাবে পাকিস্তানে ৫৪ মিলিয়ন ডলাৰ লোকচান কৰিছিল।
পাকিস্তানৰ আকাশমাৰ্গ এতিয়াও ভাৰতীয় বিমানৰ বাবে বন্ধ হৈয়ে আছে আৰু আগষ্ট মাহৰ শেষ সপ্তাহলৈকে বন্ধ থাকিব। একেদৰে ভাৰতীয় আকাশমাৰ্গও বন্ধ হৈ থাকিব আৰু সাৰ্বভৌমত্ব আৰু নিৰাপত্তা ৰক্ষাৰ সময়ত কোনো মূল্য বেছি নহয় বুলি ভাৰত মন্ত্ৰালয়ে স্পষ্ট কৰি দিছে।
