বিগত পাঁচ দিন ধৰি আমেৰিকা, ইজৰাইল, ইৰাণৰ মাজত যুদ্ধ চলি আছে। আয়াতুল্লাহ আলী খামেনেইৰ মৃত্যুৰ পিছত তেওঁৰ উত্তৰাধিকাৰী মোজতাবাক ৰাষ্ট্ৰপতি হিচাপে নিযুক্তি দিয়া হৈছে।
মোজতাবা খামেনেই এতিয়া ইৰাণৰ নতুন উচ্চতম নেতা। ইৰাণৰ এই ঘোষণাৰ পিছতে ইজৰাইলে মুকলি ভাবুকি জাৰি কৰে। ইজৰাইলৰ প্ৰতিৰক্ষা মন্ত্ৰীয়ে উল্লেখ কৰে যে, যিয়েই সৰ্বোচ্চ নেতা হ’ব তেওঁৱেই ইজৰাইলৰ লক্ষ্য হ’ব।
ইজৰাইলৰ প্ৰতিৰক্ষা মন্ত্ৰী কাটজে বুধবাৰে ছ’চিয়েল মিডিয়া প্লেটফৰ্ম এক্সত এক বিবৃতি প্ৰকাশ কৰে। তেওঁ পোষ্টটোত লিখে যে, ইৰাণৰ সন্ত্ৰাসবাদী শাসনে ইজৰাইলক ধ্বংস কৰাৰ পৰিকল্পনা অব্যাহত ৰাখিবলৈ আৰু নেতৃত্ব দিবলৈ নিযুক্তি দিয়া প্ৰতিজন নেতাই ইজৰাইলৰ লক্ষ্য হ’ব। ইজৰাইলে কাকো ৰেহাই নিদিয়ে।আয়াতুল্লাহ আলী খামেনেইৰ দৰেই ইজৰাইলে আয়াতুল্লাহ আলী খামেনেইৰ পুত্ৰকো লক্ষ্য কৰি ল’ব বুলি ধাৰণা কৰা হৈছে।
তেহৰাণস্থিত বিশেষজ্ঞ বিধানসভাই ৫৬ বছৰীয়া মোজতাবা খামেনেইক দেশৰ নতুন উচ্চতম নেতা হিচাপে নিৰ্বাচিত কৰিছে। প্ৰয়াত প্ৰাক্তন সৰ্বোচ্চ নেতা আয়াতুল্লাহ আলী খামেনেইৰ জ্যেষ্ঠ পুত্ৰ মোজতাবা।
শেহতীয়াকৈ আমেৰিকা আৰু ইজৰাইলৰ আক্ৰমণত আলী খামেনেইৰ মৃত্যুৱে নতুন নেতৃত্বৰ বিষয়ে জল্পনা-কল্পনাৰ ইন্ধন যোগাইছিল। মোজতাবাৰ এই দাবী প্ৰবল বুলি কোৱা হয়, যদিও তেওঁ কোনো ডাঙৰ ধৰ্মীয় পদবীত অধিষ্ঠিত হোৱা নাই, তথাপিও তেওঁক দেশৰ সামৰিক বাহিনী আৰু বিধানসভাৰ সমৰ্থন আছে।
এক সংবাদ মাধ্যমৰ প্ৰতিবেদনত দাবী কৰা হৈছে যে বিগত বৰ্ষত আলী খামেনেইয়ে সম্ভাৱ্য উত্তৰাধিকাৰীৰ তালিকাত মোজতাবাৰ নাম অন্তৰ্ভুক্ত কৰা নাছিল। তদুপৰি পিতৃৰ পৰা পুত্ৰলৈ ক্ষমতা হস্তান্তৰ কৰাটো সাধাৰণতে ছিয়া ধৰ্মীয় পৰম্পৰাত গ্ৰহণযোগ্য নহয়, যাৰ ফলত এই সিদ্ধান্ত আৰু অধিক বিতৰ্কিত হৈ পৰিছে। কোৱা হৈছে যে,ইৰাণৰ জনসাধাৰণে আয়াতুল্লাহৰ এজন পুত্ৰক উচ্চতম নেতা হোৱাটো বিচাৰিছিল। জনসাধাৰণৰ আৱেগক বিবেচনা কৰি এই সিদ্ধান্ত লোৱা হৈছিল।
সংবাদ মাধ্যমৰ খবৰ অনুসৰি মোজতাবাৰ নিৰ্বাচনত আই আৰ জি চিৰ প্ৰভাৱ আছিল, যাৰ বাবে তেওঁক ইৰাণৰ নতুন উচ্চতম নেতা হিচাপে নিযুক্তি দিয়া হৈছে। কিন্তু ইৰাণ ইছলামিক ৰিপাব্লিকে দীৰ্ঘদিন ধৰি নেপোটিজমক সমালোচনা কৰি নিজকে নীতিগত ব্যৱস্থা হিচাপে উপস্থাপন কৰি আহিছে, সেয়েহে মোজতাবাৰ নিযুক্তিয়ে বহু প্ৰশ্নৰ উত্থাপন কৰিছে। ফলস্বৰূপে মোজতাবাৰ ভৱিষ্যতৰ প্ৰশ্নটো তাৎপৰ্যপূৰ্ণ।
