ইজৰাইল আৰু আমেৰিকাৰ আক্ৰমণত ইৰাণৰ নেতা আয়াতুল্লাহ আলী খামেনেইৰ লগতে তেওঁৰ পৰিয়ালৰ কেইবাজনো সদস্য নিহত হৈছে। দুয়োখন দেশে তেহৰাণৰ ওপৰত আক্ৰমণ অব্যাহত ৰাখিছে। ইফালে লেবাননৰ মিলিচীয়া গোট হিজবুল্লাইও উচ্চতম নেতাৰ মৃত্যুৰ প্ৰতিশোধ ল’বলৈ যুদ্ধত যোগদান কৰিছে।
ইজৰাইলৰ ফালে ক্ষেপণাস্ত্ৰ আৰু ড্ৰোন আক্ৰমণ চলাইছে বুলি হিজবুল্লাই জানিবলৈ দিয়ে। উচ্চতম নেতা আলী খামেনেইৰ হত্যাকাণ্ডৰ প্ৰতিশোধ বুলি কোৱা হয়। ২০২৪ চনৰ নৱেম্বৰ মাহত ইজৰাইলৰ সৈতে যুদ্ধবিৰতিৰ পিছত ইজৰাইলৰ বিৰুদ্ধে হিজবুল্লাহৰ এইটোৱেই প্ৰথম আক্ৰমণ।
হিজবুল্লাহৰ আক্ৰমণৰ পিছত ইজৰাইল প্ৰতিৰক্ষা বাহিনীয়ে লেবাননত থকা নিজৰ স্থানত আক্ৰমণ আৰম্ভ কৰিছে। ইজৰাইলৰ সংবাদ মাধ্যমৰ বাতৰি অনুসৰি বেইৰুটত হিজবুল্লাহৰ স্থানক লক্ষ্য কৰি লোৱা হৈছে। ইজৰাইলৰ সেনাই কয় যে বেইৰুট অঞ্চলত হিজবুল্লাহৰ জ্যেষ্ঠ বিষয়াক আক্ৰমণ কৰা হৈছে। লগতে হিজবুল্লাহৰ এজন শীৰ্ষ বিষয়াক লক্ষ্য কৰি লোৱা বুলিও কয় যদিও তেওঁলোকৰ নাম প্ৰকাশ কৰা হোৱা নাই।
আইডিএফে কয় যে এই উগ্ৰপন্থী সংগঠনটোক ইজৰাইলৰ প্ৰতি ভাবুকি কঢ়িয়াই আনি নাগৰিকৰ ক্ষতি কৰিবলৈ নিদিয়ে। আইডিএফে উল্লেখ কৰে যে সন্ত্ৰাসবাদী সংগঠন হিজবুল্লাই লেবানন আৰু ইয়াৰ জনসাধাৰণকো ধ্বংস কৰি আছে। ইফালে ইজৰাইলী সেনাই লেবাননৰ দক্ষিণৰ ৫৩খন গাঁও আৰু চহৰৰ বাসিন্দাসকলক ঘৰ-দুৱাৰ খালী কৰিবলৈ কয়। হিজবুল্লাহৰ মুৰব্বী নাইম কাছেমে ২০২৬ চনৰ জানুৱাৰী মাহত উল্লেখ কৰিছিল যে যদিহে আমেৰিকাই ইৰাণক আক্ৰমণ কৰে তেন্তে তেওঁ নিৰপেক্ষ হৈ নাথাকিব।
