সমগ্ৰ বিশ্বক জোকাৰি যোৱা এক ঘটনা সংঘটিত হৈছে ইৰাণত। দেশখনৰ ৰাজধানী তেহৰাণৰ উচ্চতম ন্যায়ালয়ত অস্ত্ৰধাৰী দুৰ্বৃত্তই প্ৰৱেশ কৰি দুজন ন্যায়াধীশক গুলীয়াই হত্যা কৰে। ইয়াৰ উপৰি এই ঘটনাত এজন প্ৰহৰীও আহত হৈছে।
ইফালে আক্ৰমণ সংঘটিত কৰা লোকজনে পিছত গুলীয়াই আত্মহত্যা কৰে। আক্ৰমণৰ পিছত আদালতৰ চৌপাশে নিৰাপত্তা বৃদ্ধি কৰা হৈছে।
প্ৰতিবেদন অনুসৰি এই গুলীচালনাত ন্যায়াধীশ মৌলৱী মহম্মদ মোগিছেহ আৰু ন্যায়াধীশ আলী ৰজিনীৰ মৃত্যু হয়। উল্লেখ্য যে, ইয়াৰ পূৰ্বেও ১৯৯৯ চনত ন্যায়াধীশ ৰজিনীক হত্যাৰ চেষ্টা চলোৱা হৈছিল যদিও সেই প্ৰচেষ্টা সফল হোৱা নাছিল।
উল্লেখ্য যে, ন্যায়াধীশ জৰিনীয়ে বিভিন্ন গোচৰত অভিযুক্ত লোকসকলক কঠোৰ শাস্তি দিয়াৰ বাবে পৰিচিত আছিল।
ইফালে মোগিছেহে সাংবাদিক আৰু ইণ্টাৰনেট ব্যৱহাৰকাৰীক ১২৭ বছৰ পৰ্যন্ত কাৰাদণ্ডৰ শাস্তি প্ৰদান কৰিছিল, যাৰ ফলত ন্যায়াধীশগৰাকীক আমেৰিকা চৰকাৰে নিষেধাজ্ঞা আৰোপ কৰিছিল। বিভিন্ন কঠোৰ শাস্তি প্ৰদানৰ বাবে চৰ্চাত থকা ন্যায়াধীশ দুগৰাকীৰ মৃত্যুত এতিয়া তীব্ৰ চাঞ্চল্যই বিৰাজ কৰিছে ইৰাণত।
