টুভালু দক্ষিণ প্ৰশান্ত মহাসাগৰত অৱস্থিত এখন দ্বীপ দেশ। এইখন পৃথিৱীৰ অন্যতম সৰু দেশ। এতিয়ালৈকে এই দেশত সকলোধৰণৰ লেনদেন কেৱল নগদ ধনেৰেহে হৈছিল।
প্ৰশান্ত মহাসাগৰত অৱস্থিত এই দেশখনে ১৫ এপ্ৰিলত প্ৰথমটো এটিএম স্থাপন কৰি ইতিহাসৰ সৃষ্টি কৰিছে।বিশ্বৰ অন্যতম কম জনবসতিপূৰ্ণ দেশ টুভালুৰ জনসংখ্যা ১২-১৩ হাজাৰৰ ভিতৰত। এই দেশখন মাত্ৰ ২৬ বৰ্গ কিলোমিটাৰ এলেকাত বিস্তৃত। এই দেশখন সৌন্দৰ্য আৰু শান্তিপূৰ্ণ পৰিৱেশৰ বাবে জনাজাত।
সংবাদ মাধ্যমৰ প্ৰতিবেদন অনুসৰি, অষ্ট্ৰেলিয়া আৰু হাৱাইৰ মাজত অৱস্থিত এই সৰু দেশখনত এটিএমৰ প্ৰৱৰ্তনক এক ডাঙৰ কৃতিত্ব বুলি বিবেচিত হৈছে। মূল দ্বীপ ফুনাফুটিত প্ৰধানমন্ত্ৰী ফেলেটি টিওৱে উদ্বোধন কৰে এই ATM। স্থানীয় লোকৰ সৈতে কেক কাটি ফেলেটি টিওৱে ইয়াক টুভালুৰ বাবে এক গুৰুত্বপূৰ্ণ মুহূৰ্ত বুলি অভিহিত কৰে।
নেশ্যনেল বেংক অৱ টুভালুৰ জেনেৰেল মেনেজাৰ ছিঅ’জে টিঅ’ই এই ATM ৰ সুবিধাক গেম চেঞ্জাৰ বুলি অভিহিত কৰে। তেওঁ কয় যে ইয়াৰ দ্বাৰা দেশৰ ১১,২০০ জন লোকৰ বাবে প্ৰগতিৰ এক নতুন বাট মুকলি হ’ব। পেচিফিক টেকন’লজি লিমিটেডৰ নিছাৰ আলীয়ে কয় যে, এই ATM ৰ জৰিয়তে মানুহক আধুনিক বেংকিং সেৱাৰ সৈতে সংযোগ কৰা হ’ব।
উল্লেখ্য যে, টুভালুত ৯টা দ্বীপ আছে। ইমান সৰু দেশ হোৱাৰ পিছতো ২০২৩ চনত ৩ হাজাৰতকৈও অধিক পৰ্যটক এই ঠাইলৈ আহিছিল।ফুনাফুটিত দেশখনৰ একমাত্ৰ বিমানবন্দৰ আছে, য’ত চুবুৰীয়া দেশ ফিজিলৈ বিমান সেৱা আগবঢ়োৱা হয়।
টুভালুৰ ভৌগোলিক অৱস্থানে ইয়াক এক জটিল দেশ কৰি তুলিছে আৰু সাগৰৰ জলপৃষ্ঠ অবিৰতভাৱে বৃদ্ধি পোৱাৰ বাবে দেশখনৰ ভূমি হ্ৰাস পাইছে। জলবায়ু পৰিৱৰ্তনৰ ফলত আটাইতকৈ বেছি ক্ষতিগ্ৰস্ত দেশসমূহৰ ভিতৰত অন্যতম হৈছে টুভালু।
