বৃহস্পতিবাৰৰ পৰা গাজাত ইজৰাইলৰ আক্ৰমণত শিশুসহ কমেও ৪২ জন লোকে প্ৰাণ হেৰুৱায়। চিকিৎসালয় আৰু জৰুৰীকালীন কৰ্মীসকলে এই তথ্য প্ৰদান কৰে।
আল-আকছা শ্বহীদ চিকিৎসালয়ৰ কৰ্মচাৰীসকলে জনোৱা অনুসৰি, মধ্য গাজাৰ নুছৰত, জাৱিদা, মাঘাজী আৰু দেইৰ আল বালাহত সংঘটিত এই আক্ৰমণত এক ডজনতকৈও অধিক মহিলা আৰু শিশু নিহত হৈছে। এদিন পূৰ্বে ইজৰাইলৰ আক্ৰমণত এই অঞ্চলসমূহত কেইবা ডজন লোক নিহত হৈছিল।
মাঘাজী শৰণাৰ্থী শিবিৰত আব্দুল ৰহমান আল নাব্ৰিছিয়ে কয় যে, ক্ষেপণাস্ত্ৰ আক্ৰমণৰ শব্দত তেওঁলোকে সাৰ পাই উঠিছিল। বৃহস্পতিবাৰে হামাছৰ নিৰাপত্তা বিষয়া আৰু ইজৰাইলে ঘোষণা কৰা মানৱীয় অঞ্চলৰ ওপৰত আক্ৰমণ সংঘটিত হয়।
শুকুৰবাৰে পুৱা ইজৰাইলৰ জনসাধাৰণেও আক্ৰমণৰ সন্মুখীন হ’বলগীয়া হয়। ইজৰাইলে কয় যে, য়েমেনৰ পৰা দেশখনলৈ ক্ষেপণাস্ত্ৰ নিক্ষেপ কৰাৰ ফলত জেৰুজালেম আৰু মধ্য ইজৰাইলত বিমান আক্ৰমণৰ ছাইৰেন বাজি উঠাৰ বাবে জনসাধাৰণে নিৰাপদ স্থানলৈ পলায়ন কৰে। জেৰুজালেমত ক্ষেপণাস্ত্ৰ বা ইন্টাৰচেপ্টৰৰ পৰা ক্ষীণ বিস্ফোৰণৰ শব্দ শুনা গ’ল যদিও তাৎক্ষণিকভাৱে কোনো লোকৰ আহত বা ক্ষতিৰ খবৰ পোৱা নগ’ল।
এই আক্ৰমণ অব্যাহত থকাৰ লগে লগে যুদ্ধবিৰতিৰ আলোচনাৰ প্ৰচেষ্টাও পুনৰ আৰম্ভ হোৱাৰ সম্ভাৱনা আছে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ কাৰ্যালয়ে কয় যে, তেওঁ মোছাদৰ চোৰাংচোৱা সংস্থা, শ্বিন বেট আভ্যন্তৰীণ নিৰাপত্তা সংস্থা আৰু সেনাৰ এটা প্ৰতিনিধি দলক কাটাৰত অনুষ্ঠিত হ’বলগীয়া আলোচনাৰ বাবে অনুমোদন জনাইছে।
২০২৩ চনৰ ৭ অক্টোবৰত হামাছৰ নেতৃত্বত উগ্ৰপন্থীয়ে ইজৰাইলৰ ওপৰত আক্ৰমণ চলাই আৰম্ভ হোৱা ১৫ মাহৰ যুদ্ধৰ সময়ছোৱাত আমেৰিকাৰ নেতৃত্বত আলোচনা বাৰে বাৰে স্থবিৰ হৈ পৰিছে। উগ্ৰপন্থীয়ে প্ৰায় ১২০০ লোকক হত্যা কৰাৰ লগতে প্ৰায় ২৫০ জন লোকক অপহৰণ কৰে। প্ৰায় ১০০ জন পণবন্দী এতিয়াও গাজাৰ ভিতৰত আছে, ইয়াৰে কমেও এক তৃতীয়াংশৰ মৃত্যুৰ আশংকা কৰা হৈছে।
