গাজাৰ সশস্ত্ৰ সংগঠন হামাছে কেইবামাহো পিছত ৬ এপ্ৰিলত নিশা ইজৰাইলৰ ওপৰত এক বৃহৎ আক্ৰমণ সংঘটিত কৰে। হামাছে দক্ষিণ ইজৰাইললৈ ১০টা ৰকেট নিক্ষেপ কৰে।
ইয়াৰে ইজৰাইলী সেনাই মাত্ৰ ৫ টা ৰকেট বন্ধ কৰিবলৈ সক্ষম হয়, বাকী ৫ টা ৰকেট ইজৰাইলত পৰি বিস্তৰ ক্ষতিসাধন কৰিছিল।
ইজৰাইলৰ আচকেলন চহৰত এটা ৰকেট পৰি আহত হয় এজন ৩০ বছৰীয়া যুৱক।এই আক্ৰমণৰ দায়িত্ব স্বীকাৰ কৰে হামাছে।
সংবাদ মাধ্যম আল জাজিৰাৰ মতে, নিশা ৯ বজাৰ কিছু সময়ৰ পিছতে গাজাৰ ডেইৰ আল বালাহ অঞ্চলৰ পৰা ইজৰাইলৰ উপকূলীয় চহৰ আচকেলন আৰু আছদোদত ৰকেট নিক্ষেপ কৰা হয়। এই আক্ৰমণৰ প্ৰতি হামাছে ডাঙৰ সঁহাৰি দিব লাগিব বুলি ইজৰাইল চৰকাৰে প্ৰকাশ কৰে।
ইজৰাইলৰ প্ৰতিৰক্ষা মন্ত্ৰী যোয়াভ গালাণ্টে প্ৰধানমন্ত্ৰী বেঞ্জামিন নেতান্যায়াহুৰ সৈতে আলোচনা কৰি ইজৰাইলৰ সেনাবাহিনীক হামাছৰ ওপৰত বৃহৎ আক্ৰমণ চলাই ধ্বংস কৰিবলৈ নিৰ্দেশ দিয়ে।
ইয়াৰ পিছত গাজাত আক্ৰমণ চলাই ইজৰাইলী সেনাই গাজাৰ ডেইৰ আল-বালাহ অঞ্চলত বাস কৰা পেলেষ্টাইনীসকলক আক্ৰমণ কৰাৰ পূৰ্বে গুচি যাবলৈ সকীয়াই দিয়ে। এই সতৰ্কবাণী ইজৰাইলী সেনাৰ আৰবী মুখপাত্ৰ কৰ্ণেল আভিচাই এড্ৰাইয়ে দিয়ে। ইয়াৰ পিছত ইজৰাইলী সেনাই ড্ৰোনেৰে আক্ৰমণ কৰে। এই আক্ৰমণত সেই ৰকেট লঞ্চাৰবোৰক লক্ষ্য কৰি লোৱা হৈছিল, যিবোৰৰ সহায়ত ইজৰাইলক আক্ৰমণ কৰা হৈছিল।
ইজৰাইলৰ এটা উচ্চ এপাৰ্টমেণ্টত হামাছৰ ৰকেট পৰি থকা এটা ভিডিঅ’ ছ’চিয়েল মিডিয়াত প্ৰকাশ পাইছে। এই আক্ৰমণ সংঘটিত হোৱাৰ সময়তেই ইজৰাইলৰ প্ৰধানমন্ত্ৰী বেঞ্জামিন নেতান্যায়াহুৱে আমেৰিকা ভ্ৰমণলৈ যায়।
তেওঁ নিজৰ বিমানৰ পৰা প্ৰতিৰক্ষা মন্ত্ৰী ইজৰাইল কাৰ্টজক ফোন কৰি হামাছত আক্ৰমণৰ বাবে সঁহাৰি বিচাৰে। প্ৰধানমন্ত্ৰীৰ সৈতে আলোচনাৰ অন্তত ইজৰাইল কাৰ্টজে কয় যে ইতিমধ্যে গাজা ষ্ট্ৰিপত হামাছৰ বিৰুদ্ধে চলি থকা আক্ৰমণ আৰু অধিক তীব্ৰতৰ কৰিবলৈ ইজৰাইলী সেনাক নিৰ্দেশ দিয়া হৈছে।
