জম্মু-কাশ্মীৰৰ বহু ঠাইত অব্যাহত আছে ধাৰাসাৰ বৰষুণ। মঙলবাৰে ডোডা জিলাৰ ভালেছা অঞ্চলত ডাৱৰ বিস্ফোৰণৰ ঘটনা সংঘটিত হয়। ইয়াৰ বাবেই জীৱন বিঘিনি ঘটিছে বহুজনৰ।
ইতিমধ্যে ডাৱৰ বিস্ফোৰণৰ ফলত ৩১জনকৈ লোকৰ প্ৰাণহানিৰ খবৰ পোৱা গৈছে। পানীত জাহ গৈছে বহু ঘৰ। জম্মু-শ্ৰীনগৰ ৰাষ্ট্ৰীয় ঘাইপথ (NH-44)ৰ যাতায়ত সম্পূৰ্ণৰূপে স্তব্ধ হৈ পৰিছে। বহু ঠাইত অবিৰত বৰষুণৰ বাবে ভূমিস্খলন আৰু গৰাখহনীয়াৰ ঘটনা সংঘটিত হোৱাৰ খবৰ পোৱা গৈছে।
ধাৰাবাহিক বৰষুণৰ বাবে বহু ঠাইত ভূমিস্খলন আৰু পাহাৰৰ পৰা শিল সৰি পৰাৰ ঘটনা সংঘটিত হোৱাৰ খবৰ পোৱা গৈছে, যাৰ বাবে পথত চলাচল সম্পূর্ণৰূপে বন্ধ হৈ পৰিছে৷ এই পথত অপ্ৰয়োজনীয় যাতায়তৰ পৰা বিৰত থাকিবলৈ আৰু বতৰ স্বাভাৱিক নোহোৱালৈকে ঘৰৰ পৰা ওলাই নাযাবলৈ জনসাধাৰণে প্ৰশাসনক আহ্বান জনাইছে।
ভূমিস্খলনৰ বাবে কাটৰা-শিৱখোৰি ৰাষ্ট্ৰীয় ঘাইপথ বন্ধ কৰি দিছে প্ৰশাসনে। ধাৰাসাৰ বৰষুণৰ বাবে ৰিয়াছি জিলাৰ চিলা গাঁৱৰ সমীপত ভূমিস্খলন সংঘটিত হৈছে, যাৰ বাবে কাটৰা-শিৱখোৰি ৰাষ্ট্ৰীয় ঘাইপথ বন্ধ হৈ পৰিছে। ঘাইপথত ধ্বংসাৱশেষ আৰু শিল পৰাৰ ফলত যাতায়ত স্তব্ধ হৈ পৰিছে। আৰক্ষী আৰু প্ৰশাসনে ততাতৈয়াকৈ বিকল্প পথেৰে যাতায়তৰ পথ অন্য দিশলৈ লৈ গৈছে।
