বিগত কেইবাদিনো ধৰি থকা নেৰানেপেৰা বৰষুণৰ ফলত জম্মুৰ ৰিয়াছি জিলাৰ মাহোৰত সংঘটিত হৈছে ভয়ংকৰ ভূমিস্খলন। এই ঘটনাত অঞ্চলটোৰ কেইবাটাও বাসগৃহ ধ্বংসস্তূপত পৰিণত হোৱাৰ লগতে প্ৰায় ৭ গৰাকী লোক সন্ধানহীন হৈ থকাৰ খবৰ পোৱা গৈছে।
আনহাতে ৰামবন জিলাৰ ৰাজগড় অঞ্চলটো ভূমিস্খলনৰ ফলত যথেষ্ট ক্ষয়-ক্ষতি হৈছে। ইয়াত ভূমিস্খলনৰ ফলত তিনিজন লোকৰ মৃত্যু হোৱাৰ লগতে দুগৰাকী লোক সন্ধানহীন হৈ আছে। প্ৰশাসন আৰু উদ্ধাৰকাৰী দলে উদ্ধাৰ কাৰ্য অব্যাহত ৰাখিছে।
আৰক্ষী-প্ৰশাসনে জনোৱা অনুসৰি এই ভূমিস্খলনৰ ফলত দুটা ঘৰ আৰু এখন বিদ্যালয় সম্পূৰ্ণৰূপে ক্ষতিগ্ৰস্ত হৈছে।
ইফালে জম্মু-কাশ্মীৰৰ বান্দীপুৰা জিলাৰ দুৰেজ ছেক্টৰত শুকুৰবাৰে নিশা ডাৱৰ বিস্ফোৰণৰ ঘটনা সংঘটিত হয়। ইয়াৰ পিছতে অঞ্চলটোত অভাৱনীয় বান পৰিস্থিতিৰ সৃষ্টি হয় যদিও ঘটনাত কোনো লোকৰে হতাহত হোৱাৰ খবৰ লাভ কৰা নাই।
আনহাতে বৰ্তমান পৰিস্থিতিৰ প্ৰতি লক্ষ্য ৰাখি শুকুৰবাৰে জম্মু, কাটৰা আৰু উধমপুৰ ৰে’লৱে ষ্টেশ্যনৰ পৰা অহা যোৱা কৰা ৪৬ খন ৰে’ল সেৱা বাতিল কৰাৰ কথা ঘোষণা কৰে।
উল্লেখ্য যে, শেহতীয়াকৈ জম্মু-কাশ্মীৰত হোৱা ধাৰাসাৰ বৰষুণৰ ফলত উপত্যকাটোত হোৱা অস্বাভাৱিক পৰিস্থিতিৰ ফলত ১১০ গৰাকীৰো অধিক লোকৰ মৃত্যু হৈছে। মৃত লোকসকলৰ অধিকাংশই হৈছে তীৰ্থযাত্ৰী।
ইফালে জম্মু-কাশ্মীৰৰ শেহতীয়া পৰিস্থিতিৰ বুজ লোৱাৰ উদ্দেশ্যে ৩১ আগষ্ট অৰ্থাত দেওবাৰে দুদিনীয়া ভ্ৰমণসূচীৰে জম্মু ভ্ৰমণ কৰাৰ সম্ভাৱনা আছে কেন্দ্ৰীয় গৃহমন্ত্ৰী অমিত শ্বাহৰ।
