আমেৰিকাৰ প্ৰাক্তন উপ-ৰাষ্ট্ৰপতি কমলা হেৰিছ আগবাঢ়িছে পুনৰ এবাৰ এক বৃহৎ ৰাজনৈতিক সিদ্ধান্তৰ দিশে। খবৰ অনুসৰি, ২০২৬ চনত কেলিফৰ্ণিয়াৰ গৱৰ্ণৰ পদৰ বাবে প্ৰতিদ্বন্দ্বিতা কৰাৰ কথা চিন্তা কৰিছে হেৰিছে।
যদিও তেওঁ বৰ্তমানলৈ আনুষ্ঠানিকভাৱে প্ৰাৰ্থীত্ব ঘোষণা কৰা নাই, তথাপিও চলিত বৰ্ষৰ গ্ৰীষ্মৰ শেষৰ ফালে এই সন্দৰ্ভত চূড়ান্ত সিদ্ধান্ত লোৱাৰ সম্ভাৱনা আছে। যদিহে তেওঁ নিৰ্বাচনত প্ৰতিদ্বন্দ্বিতা কৰি জয়ী হয়, তেন্তে তেওঁ বৰ্তমানৰ কেলিফৰ্ণিয়াৰ গৱৰ্ণৰ গেভিন নিউজমৰ ঠাইত ল’ব।
কমলা হেৰিছৰ ৰাজনৈতিক জীৱন কেলিফৰ্ণিয়াৰ পৰাই আৰম্ভ হৈছিল। ২০১০ চনত কেলিফৰ্ণিয়াৰ এটৰ্নী জেনেৰেল হিচাপে কাৰ্যভাৰ গ্ৰহণ কৰি তিনিবাৰকৈ ৰাজ্যিক নিৰ্বাচনত জয়ী হৈছিল।
২০১৪ চনত তেওঁ পুনৰ এটৰ্নী জেনেৰেল নিৰ্বাচিত হয়। ইয়াৰ পিছত ২০১৬ চনত তেওঁ আমেৰিকাৰ চেনেটৰ বাবে প্ৰতিদ্বন্দ্বিতা কৰি জয়লাভ কৰে। তেওঁৰ আকৰ্ষণীয় ৰাজনৈতিক অভিজ্ঞতাৰ বাবে ২০২০ চনত জো বাইডেনৰ সৈতে উপ-ৰাষ্ট্ৰপতি হিচাপে নিৰ্বাচিত হয়। কিন্তু ২০২৪ চনৰ ৰাষ্ট্ৰপতি নিৰ্বাচনত ড’নাল্ড ট্ৰাম্পৰ বিৰুদ্ধে নিৰ্বাচনত পৰাস্ত হৈছিল।
যদি কমলা হেৰিছে কেলিফৰ্ণিয়াৰ গৱৰ্ণৰ পদৰ বাবে প্ৰতিদ্বন্দ্বিতা কৰে, তেন্তে তেওঁ আন বহু ডেম’ক্ৰেটিক প্ৰাৰ্থীৰ সৈতেও মুখামুখি হ’ব। ইয়াৰ ভিতৰত আছে কেলিফৰ্ণিয়াৰ লেফটেনেণ্ট গৱৰ্ণৰ এলেনি কৌনালাকিছ, ৰাজ্যখনৰ প্ৰাক্তন চেনেট নেতা টনি এটকিন্স, লছ এঞ্জেলছৰ প্ৰাক্তন মেয়ৰ এণ্টনিঅ’ ভিলাৰাইগোছা, ৰাজ্যিক বিদ্যালয়ৰ পৰিচালক টনি থাৰ্মণ্ড আৰু প্ৰাক্তন নিয়ন্ত্ৰক বেটী ইয়েৰ দৰে নাম।
কেলিফৰ্ণিয়াৰ এটৰ্নী জেনেৰেল ৰব বণ্টাই কয় যে, যদি কমলা হেৰিছে এই নিৰ্বাচনত যোগদান কৰে, তেন্তে তেওঁ এগৰাকী অতি ফলপ্ৰসূ প্ৰাৰ্থী হিচাপে প্ৰমাণিত হ’ব।
কেলিফৰ্ণিয়াৰ গৱৰ্ণৰ নিৰ্বাচনৰ বাবে ভোটদান ২০২৬ চনৰ ৩ নৱেম্বৰত অনুষ্ঠিত হ’ব, আনহাতে ইয়াৰ প্ৰাথমিক পৰ্যায় ২০২৬ চনৰ জুন মাহত অনুষ্ঠিত হ’ব। এনে পৰিস্থিতিত সকলো প্ৰাৰ্থীয়েই নিজৰ প্ৰস্তুতিত ব্যস্ত হৈ পৰে।
কমলা হেৰিছৰ সম্ভাৱ্য প্ৰাৰ্থীত্বই নিৰ্বাচনী প্ৰতিদ্বন্দ্বিতাক অধিক আকৰ্ষণীয় কৰি তুলিব পাৰে। এতিয়া লক্ষ্যণীয় হ’ব কমলা হেৰিছে আনুষ্ঠানিকভাৱে দৌৰত প্ৰৱেশৰ কথা ঘোষণা কৰে নে নকৰে। যদিহে তেওঁ নিৰ্বাচনত অৱতীৰ্ণ হোৱাৰ সিদ্ধান্ত লয়, তেন্তে ই তেওঁৰ ৰাজনৈতিক কেৰিয়াৰৰ এক টাৰ্নিং পইণ্ট হিচাপে প্ৰমাণিত হ’ব পাৰে।
