দেশৰ জনপ্ৰিয় কমেডিয়ান কপিল শৰ্মাৰ কানাডাস্থিত এখন ৰেষ্টুৰেণ্টত ভয়ংকৰ গুলীচালনাৰ ঘটনা সংঘটিত হৈছে। সন্ত্ৰাসবাদী হৰজীত সিং লড্ডীয়ে এই গুলীচালনাৰ দায়িত্ব স্বীকাৰ কৰিছে। লড্ডী ভাৰতৰ এন আই এৰ মোষ্ট ৱাণ্টেড সন্ত্ৰাসবাদী আৰু তেওঁ BKI(বব্বৰ খালছা ইণ্টাৰনেশ্যনেল)ৰ সৈতে জড়িত।
বিভিন্ন সংবাদ মাধ্যমত প্ৰকাশ পোৱা প্ৰতিবেদন অনুসৰি, কপিল শৰ্মাৰ পুৰণি এক মন্তব্যক লৈয়ে এই গুলীচালনাৰ ঘটনা সংঘটিত কৰিছে সন্ত্ৰাসবাদী লড্ডীয়ে।
উল্লেখ্য যে, কিছুদিন পূৰ্বে কমেডিয়ান কপিল শৰ্মাৰ KAP’S CAFE নামৰ এই ৰেষ্টুৰেণ্টখন মুকলি কৰা হৈছিল আৰু এইখন আন্তঃৰাষ্ট্ৰীয় ৰেষ্টুৰেণ্ট প্ৰজেক্টৰ প্ৰথমখন আছিল বুলি জানিব পৰা গৈছে।
ইফালে, নিৰাপত্তাৰক্ষী বাহিনী আৰু মুম্বাই আৰক্ষী সূত্ৰই জানিব দিয়া অনুসৰি, গুলীবৰ্ষণ হোৱা কপিল শৰ্মাৰ ৰেষ্টুৰেণ্ট আৰু তেওঁৰ কাষৰ অট্টালিকাৰ মালিক অন্য এগৰাকী ব্যক্তি।
অৱশ্যে এই ঘটনা সন্দৰ্ভত কপিল শৰ্মাৰ তৰফৰ পৰা এই পৰ্যন্ত কোনো ধৰণৰ স্পষ্টীকৰণ বা প্ৰতিক্ৰিয়া অহা নাই।
