শুকুৰবাৰে কাটিহাৰ-বৰাউনী ৰে’লপথত সংঘটিত হয় এক শোকাৱহ দুৰ্ঘটনা। কাধাগোলা আৰু ছেমাপুৰ ষ্টেচনৰ মাজত মহাৰাণী গাঁৱৰ সমীপত অৱধ আছাম এক্সপ্ৰেছ আৰু ৰে’লৱে ট্ৰলীৰ মাজত ভয়ংকৰ সংঘৰ্ষ হয়।
এই দুৰ্ঘটনাটোৰ ফলত ঘটনাস্থলতেই মৃত্যু হয় ট্ৰলীমেন গৰাকীৰ আৰু আন তিনিজন ৰে’লকৰ্মী গুৰুতৰভাৱে আহত হয়। দুৰ্ঘটনাৰ খবৰ লাভ কৰাৰ লগে লগে কাটিহাৰ ডিভিজনৰ পৰা স্বাস্থ্য কৰ্মীৰ এটা দল ঘটনাস্থললৈ ৰাওনা হয় বুলি জানিব পৰা গৈছে।
আহত লোকসকলক দুৰ্ঘটনাস্থলীৰ সমীপৰে এখন হাস্পতালত ভৰ্তি কৰোৱা হৈছে আৰু বৰ্তমান তেওঁলোকৰ চিকিৎসা চলি আছে।
ইফালে দুৰ্ঘটনাটোক অতি গুৰুত্বসহকাৰে গ্ৰহণ কৰি ৰে’ল প্ৰশাসনে উচ্চ পৰ্যায়ৰ তদন্তৰ নিৰ্দেশ দিছে। দুৰ্ঘটনাটোৰ বাবে কিছু সময়ৰ বাবে কাম-কাজ ব্যাহত হৈ পৰে। ৰে’ল প্ৰশাসনে সকলো ৰে’ল কৰ্মীক ট্ৰেকত কাম কৰাৰ সময়ত বিশেষ সাৱধানতা অৱলম্বন কৰিবলৈ নিৰ্দেশ প্ৰদান কৰিছে।
