আজি অলিম্পিকৰ মহিলা বক্সিং ৰিঙত নামিব অসম কন্যা লাভলিনা বৰগোহাঁই। অসমৰ বক্সাৰ লাভলীনাই আজি মহিলা মিডল ৱেট শাখাত কোৱাৰ্টাৰ ফাইনেলত অৱতীৰ্ণ হ’ব। চীনৰ প্ৰতিদ্বন্দ্বী লি কিয়ানৰ বিৰুদ্ধে আজি ৭৫ কেজি শাখাত কোৱাৰ্টাৰ ফাইনেলত খেলিব লাভলীনা বৰগোহাঁইয়ে।
ভাৰতীয় সময় অনুসৰি, আজি বিয়লি ৩ বজাত অনুষ্ঠিত হ’ব লাভলীনা আৰু লিৰ মাজত কোৱাৰ্টাৰ ফাইনেল মেচ। বিগত দুদিন ধৰি ভাৰতৰ খেলুৱৈ সকলে কোনো ধৰণৰ সফলতা লাভ কৰিবলৈ সক্ষম হোৱা নাই যদিও আজি পেৰিছ অলিম্পিকৰ পদক নিশ্চিত কৰাৰ যুঁজত নামিব লাভলীনা বৰগোহাঁই।
উল্লেখ্যে যে, ২০১৮ চনত নতুন দিল্লীত অনুষ্ঠিত হোৱা AIBA মহিলা বক্সিং বিশ্ব চেম্পিয়নশ্বিপত প্ৰথমবাৰৰ বাবে ভাৰতক প্ৰতিনিধিত্ব কৰে লাভলীনা বৰগোঁহায়ে। ২০২১ চনত জাপানত অনুষ্ঠিত টকিঅ’ অলিম্পিক ২০২০ত ইতিহাস ৰচনা কৰে লাভলীনাই। টকিঅ’ অলিম্পিকত ৬৯ কেজি শাখাত লাভলীনাই দেশক প্ৰতিনিধিত্ব কৰি ব্ৰঞ্জৰ পদক দখল কৰিবলৈ সক্ষম হয়।
ইফালে টকিঅ’ অলিম্পিকত ব্ৰঞ্জৰ পদক লাভ কৰাৰ পাছতেই লাভলীনাই পৰৱৰ্তী অলিম্পিক অৰ্থাৎ পেৰিছ অলিম্পিকত স্বৰ্ণপদকৰ লক্ষ্যৰে যুঁজিব বুলি উল্লেখ কৰিছিল।
ইফালে অলিম্পিকত লিৰ ইতিহাস চাবলৈ গ’লে, বৰ্তমানলৈ তেওঁ অলিম্পিকত দুটাকৈ পদক লাভ কৰিছে। টকিঅ’ অলিম্পিকত ৰূপ আৰু ৰিঅ’ অলিম্পিকত ব্ৰঞ্জৰ পদক লাভ কৰিছিল লি কিয়ানে ।
সেয়েহে লাভলীনা আৰু কিয়ানৰ খেলখন তীব্ৰ প্ৰতিদ্বন্দ্বিতামূলক হ’ব বুলি আশা কৰা হৈছে। ইফালে লাভলীনাই যদি কিয়ানক পৰাস্ত কৰে, তেন্তে তেওঁৰ জৰিয়তে এটা পদক নিশ্চিত হ’ব ভাৰতৰ।
সমগ্ৰ দেশবাসীয়ে আগ্ৰহেৰে অপেক্ষা কৰিছে লাভলীনাৰ খেললৈ, যাতে লাভলীনাই এইবাৰ দেশলৈ স্বৰ্ণপদক কঢ়িয়াই আনিব পাৰে। লাভলীনালৈ অলেখ শুভকামনা।
