No Result
View All Result
নেপালৰ পিছত এতিয়া আন এখন দেশত চলিছে জেন-জেডৰ হিংসাত্মক প্ৰতিবাদ। এই প্ৰতিবাদৰ বাবে পৰিস্থিতি ইমানেই ভয়াৱহ হৈ পৰিছে যে, মাদাগাস্কাৰৰ ৰাষ্ট্ৰপতি এণ্ড্ৰি ৰাজোলিনাই দেশ এৰি পলায়ন কৰিছে। দেশ এৰি যোৱাৰ পাছত মাদাগাস্কাৰৰ ৰাষ্ট্ৰপতিয়ে অজ্ঞাত স্থানৰ পৰা ৰাষ্ট্ৰীয় টেলিভিছনত দেশৱাসীক সম্বোধন কৰে।
দেশখন বিশৃংখলতাৰ মাজত ডুব যোৱাৰ লগে লগে ভাৰত মহাসাগৰৰ দ্বীপ ৰাষ্ট্ৰখনত ক্ষমতা দখল কৰাৰ অবৈধ প্ৰচেষ্টা চলিছে বুলিও কয় ৰাজোলিনাই। গভীৰ নিশাৰ ভাষণত ৰাষ্ট্ৰপতিগৰাকীয়ে কয় যে, সামৰিক অভ্যুত্থানৰ বাবে তেওঁ নিজৰ জীৱন ৰক্ষাৰ বাবে নিৰাপদ স্থান বিচাৰিবলৈ বাধ্য হৈছিল।
অৱশ্যে ৰাষ্ট্ৰপতি এণ্ড্ৰি ৰাজোলিনাই তেওঁৰ ভাষণত ৰাষ্ট্ৰপতি পদৰ পৰা পদত্যাগ কৰাৰ কথা উল্লেখ কৰা নাই। মাদাদাস্কাৰত কেইবাদিনো ধৰি চৰকাৰৰ বিৰুদ্ধে জেন-জেডৰ প্ৰতিবাদ অব্যাহত আছে। ১২ অক্টোৱৰত এটা সামৰিক ইউনিটে প্ৰতিবাদত যোগদান কৰাত পৰিস্থিতি তীব্ৰতৰ হৈ পৰে। প্ৰতিবাদৰ সময়ত সামৰিক বাহিনীৰ সদস্যসকলেও ৰাষ্ট্ৰপতি আৰু মন্ত্ৰীসকলক পদত্যাগ কৰিবলৈ দাবী জনাইছে।
মাদাগাস্কাৰত পানী আৰু বিদ্যুৎ বিচ্ছিন্নতাৰ ফলত জেন-জেডৰ প্ৰতিবাদ হিংসাত্মক ৰূপত পৰিণত হৈছে আৰু ৰাষ্ট্ৰপতি এণ্ড্ৰি ৰাজোলিনাই দেশ এৰি পলায়ন কৰিবলগীয়া হৈছে।
ৰাষ্ট্ৰপতি এণ্ড্ৰি ৰাজোলিনাইও দেশৰ সাম্প্ৰতিক পৰিস্থিতিৰ সমাধানৰ বাবে আলোচনাৰ আহ্বান জনাইছে। ৰাষ্ট্ৰপতিগৰাকীয়ে মাদাগাস্কাৰ কেনেকৈ এৰিলে বা ক’ত আছে সেই কথা স্পষ্ট কৰা নাই যদিও এটা প্ৰতিবেদনত দাবী কৰা হৈছে যে তেওঁক ফ্ৰান্সৰ সামৰিক বিমানত দেশৰ বাহিৰলৈ লৈ যোৱা হৈছিল। ফ্ৰান্সৰ বৈদেশিক মন্ত্ৰালয়ৰ এগৰাকী মুখপাত্ৰই এই সন্দৰ্ভত কোনো মন্তব্য দিবলৈ অস্বীকাৰ কৰে।
মাদাগাস্কাৰ আছিল পূৰ্বৰ ফ্ৰান্সৰ উপনিবেশ, আৰু ৰাজোলিনাৰ ফৰাচী নাগৰিকত্ব আছে বুলি কোৱা হৈছে, যিটো সত্যৰ প্ৰতি একাংশ নাগৰিকে অসন্তুষ্টি প্ৰকাশ কৰিছে। সঘনাই পানী আৰু বিদ্যুৎ বিচ্ছিন্ন হোৱাৰ প্ৰতিক্ৰিয়া স্বৰূপে ২৫ ছেপ্টেম্বৰৰ পৰা আৰম্ভ হৈছিল চৰকাৰ বিৰোধী প্ৰতিবাদ।
No Result
View All Result
