মধ্যপ্ৰদেশৰ ৰাটলামত অনুষ্ঠিত ঔদ্যোগিক সন্মিলনৰ সময়ত পোহৰলৈ আহিছে এক বৃহৎ গাফিলতি। মুখ্যমন্ত্ৰী মোহন যাদৱৰ কনভয়ৰ ১২খনো অধিক বাহন হঠাতে বাটত ৰৈ যায়। প্ৰথমতে এই বিষয়টো কাৰিকৰী দোষ যেন লাগিছিল যদিও তদন্তৰ সময়ত এই বাহনবোৰত পানী মিহলি ডিজেল ভৰোৱা বুলি জানিব পৰা গৈছে।
তথ্য অনুসৰি, এই আটাইকেইখন বাহনত দোচিগাঁৱত অৱস্থিত পেট্ৰ’ল পাম্পৰ পৰা ডিজেল ভৰোৱা হৈছিল। এই ঘটনাৰ পিছতে প্ৰশাসনত আলোড়নৰ সৃষ্টি হয়। বৰ্তমান তাৎক্ষণিক ব্যৱস্থা গ্ৰহণ কৰি সংশ্লিষ্ট পেট্ৰ’ল পাম্পটো ছীল কৰি ইন্ধনৰ নমুনা পৰীক্ষাৰ বাবে প্ৰেৰণ কৰা হৈছে।
প্ৰশাসনৰ প্ৰাৰম্ভিক তদন্তত বৰষুণৰ বাবে ডিজেল টেংকিত পানী লিক হোৱাৰ আশংকা কৰা হৈছে। কিন্তু পেট্ৰ’ল পাম্পত ইন্ধনৰ গুণাগুণ নিৰীক্ষণৰ ব্যৱস্থা কি আৰু এনে মিশ্ৰিত ইন্ধন সাধাৰণ ৰাইজকো দিয়া হৈছে নেকি বুলিও প্ৰশ্নও উত্থাপন হৈছে।
সম্প্ৰতি কালেক্টৰ আৰু জিলা প্ৰশাসনৰ দলে সমগ্ৰ বিষয়টোৰ তদন্ত আৰম্ভ কৰিছে। প্ৰতিবেদনত সম্পূৰ্ণ তথ্য অহাৰ পিছতে দোষীৰ বিৰুদ্ধে কঠোৰ ব্যৱস্থা গ্ৰহণ কৰা বুলি কোৱা হৈছে।
