দুদিনীয়া কাৰ্যসূচীৰে ভাৰতলৈ আহিছে ৰাছিয়াৰ ৰাষ্ট্ৰপতি ভ্লাদিমিৰ পুটিন। ২৩ সংখ্যক ভাৰত-ৰাছিয়া বাৰ্ষিক সন্মিলনত অংশগ্ৰহণৰ বাবে ভাৰতলৈ আহিছে পুটিন।
ভাৰত ভ্ৰমণৰ সময়ত ৰাষ্ট্ৰপতি পুটিনে ৰাষ্ট্ৰপতি দ্ৰৌপদী মুৰ্মুৰ সৈতেও সাক্ষাৎ কৰিব। খবৰ অনুসৰি, প্ৰায় ২৮ ঘণ্টীয়া ভ্ৰমণ সম্পূৰ্ণ কৰি শুকুৰবাৰে সন্ধিয়া ভাৰত এৰিব পুটিনে।
৫ ডিচেম্বৰত হায়দৰাবাদ হাউচত অনুষ্ঠিত হ’ব প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ মাজত ভাৰত-ৰাছিয়াৰ বাৰ্ষিক সন্মিলন। ইয়াত দুয়োগৰাকী নেতাই কেইবাটাও গুৰুত্বপূৰ্ণ বিষয় আৰু দ্বিপাক্ষিক অংশীদাৰিত্ব শক্তিশালী কৰাৰ উপায়ৰ ওপৰত আলোচনা কৰিব। আজি সন্ধিয়া পুটিনে ৰাছিয়াৰ ৰাজ্যিক সম্প্ৰচাৰক আৰ টি টিভিৰ নতুন ইণ্ডিয়া চেনেলটোও মুকলি কৰিব।
দিনটোৰ আৰম্ভণিতে পুৱা ১১ বজাত ৰাষ্ট্ৰপতি ভৱনত ভাৰতৰ ৰাষ্ট্ৰপতিৰ সৈতে বৈঠক অনুষ্ঠিত হ’ব। ৰাষ্ট্ৰপতি ভৱনৰ পৰা পুটিনে পোনপটীয়াকৈ ৰাজঘাটলৈ যাব, য’ত তেওঁ মহাত্মা গান্ধী স্মাৰকত শ্ৰদ্ধাঞ্জলি জনাব। ইয়াৰ পিছত পুটিন হায়দৰাবাদ হাউছলৈ আগবাঢ়িব, য’ত ভাৰত আৰু ৰাছিয়াৰ মাজত অধিকাংশ গুৰুত্বপূৰ্ণ কূটনৈতিক বৈঠক আৰু আলোচনা হ’ব।
