সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
- ভোটাৰসকলৰ বাবে এক ডাঙৰ খবৰ। ১০ ফেব্ৰুৱাৰীত প্ৰকাশ পাব ফটোযুক্ত চূড়ান্ত ভোটাৰ তালিকা।বিভিন্ন ভোটাৰৰ নাম কৰ্তনৰ বাবে প্ৰাপ্ত প্ৰ-পত্র নং-৭ৰ সন্দৰ্ভত শুনানি গ্ৰহণ অন্তিম পৰ্যায়ত। আবেদনসমূহৰ গ্রহণযোগ্যতাৰ সন্দৰ্ভত পৰীক্ষা-নিৰীক্ষা কৰিহে কৰ্তন কৰা হ’ব ভোটাৰৰ নাম।ইতিমধ্যে এগৰাকীও যোগ্য ভোটাৰৰ নাম ভোটাৰ তালিকাৰ পৰা কৰ্তন কৰা হোৱা নাই বুলি স্পষ্ট কৰি দিছে নিৰ্বাচন আয়োগে। ভোটাৰ তালিকাত নিজৰ নাম নাথাকিলে ততালিকে নিৰ্বাচনী বিষয়াৰ কাৰ্যালয়ৰ সৈতে যোগাযোগ কৰিব পাৰিব সকলোৱে। লগতে যিকোনো সমস্যাৰ বাবে ১৯৫০ নম্বৰত ফোন কৰিব পাৰিব ভোটাৰে।
- অন্ত পৰিল শ্ৰীমন্ত শংকৰদেৱ সংঘৰ ৯৫ সংখ্যক বাৰ্ষিক অধিবেশন। এইবাৰ লখিমপুৰত অনুষ্ঠিত হ’ব শ্ৰীমন্ত শংকৰদেৱ সংঘৰ পৰৱৰ্তী অধিবেশন। ২০২৭ত শংকৰদেৱ সংঘৰ ৯৬ সংখ্যক বাৰ্ষিক অধিৱেশন অনুষ্ঠিত হ’ব লখিমপুৰ জিলা শাখাৰ আতিথ্যত। আনুষ্ঠানিকভাৱে শ্ৰীমন্ত শংকৰদেৱ সংঘৰ পতাকা তেজপুৰ জিলা শাখাই অৰ্পণ কৰে লখিমপুৰ জিলাক। নিশা শংকৰদেৱ সংঘৰ ধৰ্মধ্বজাক নাৰায়ণপুৰত জনোৱা হয় আদৰণি। বিহপুৰীয়া-নাৰায়ণপুৰ জিলা শাখাৰ ভকত-বৈষ্ণৱে জনায় আদৰণি।
- চৰাইদেউৰ ক্ৰীড়াপ্ৰেমী ৰাইজৰ বাবে সুখবৰ। সোণাৰিৰ সমীপৰ থুকুবিল গুটিঘাটত নিৰ্মাণ এক অভিলাষী ক্ৰীড়া প্ৰকল্প নিৰ্মাণ কৰা হৈছে। চৰাইদেউ জিলাৰ সোণাৰিত নিৰ্মাণ কৰা এই নতুন ক্ৰীড়া প্ৰকল্পটোৱে স্থানীয় ক্ৰীড়াবিদসকলৰ বাবে উচ্চমানৰ সুবিধা প্ৰদান কৰি অঞ্চলটোত ক্ৰীড়াৰ পৰিৱেশ উন্নত কৰাত বিশেষ অৰিহণা যোগাব বুলি আশা কৰা হৈছে। প্ৰায় ৫০ বিঘা ভূমিত নিৰ্মাণ হৈছে আন্তঃৰাষ্ট্ৰীয় মানদণ্ডৰ ষ্টেডিয়াম। পূৰ্ণগতিত অব্যাহত আছে ষ্টেডিয়ামখনৰ নিৰ্মাণকাৰ্য। নিৰ্মীয়মাণ ষ্টেডিয়াম পৰিদৰ্শন সোণাৰিৰ বিধায়ক ধৰ্মেশ্বৰ কোঁৱৰৰ। এই ক্ৰীড়া প্ৰকল্পত সকলো আধুনিক সা-সুবিধা অন্তৰ্ভুক্ত থকাৰ সম্ভাৱনা আছে। এই প্ৰকল্পটোৱে চৰাইদেউ জিলাৰ ক্ৰীড়াৰ মানচিত্ৰত এক নতুন মাত্ৰা যোগ কৰিব বুলি আশা কৰা হৈছে।
- পাকিস্তানৰ ৰাজধানী চহৰৰ ছিয়া মছজিদত সংঘটিত আত্মঘাতী বোমা বিস্ফোৰণৰ সৈতে জড়িত ৪ জনকৈ লোকক গ্ৰেপ্তাৰ কৰিছে পাকিস্তানৰ নিৰাপত্তা সংস্থাই। পাকিস্তানৰ স্বৰাজ মন্ত্ৰী মহছিন নাকভিয়ে কয় যে, গ্ৰেপ্তাৰ হোৱা সন্দেহযুক্ত লোকসকলৰ ভিতৰত এজন আফগান নাগৰিকও আছে, যাক তেওঁ আত্মঘাতী আক্ৰমণৰ মাষ্টাৰমাইণ্ড বুলি অভিহিত কৰিছে। নকৱীৰ এই বক্তব্যই পুনৰ উদঙাই দিছে পাকিস্তানে ভাৰতক বদনাম কৰাৰ ষড়যন্ত্ৰ।
