২১ জুলাইত বম্বে উচ্চ ন্যায়ালয়ে ২০০৬ চনৰ মুম্বাই স্থানীয় ৰে’ল বিস্ফোৰণৰ গোচৰ সন্দৰ্ভত ডাঙৰ ৰায় দিয়ে। উচ্চ ন্যায়ালয়ে ১১জন অভিযুক্তক নিৰ্দোষী ঘোষণা কৰি ইতিমধ্যে দোষমুক্ত কৰিছে।
ন্যায়াধীশ অনিল কিলোৰ আৰু ন্যায়াধীশ এছ জি চন্দকৰ বিভাগীয় বিচাৰপীঠে এই ৰায় ঘোষণা কৰে। নিম্ন আদালতে ১২জন অভিযুক্তৰ শাস্তি ঘোষণা কৰিছিল। ইয়াৰে ৫জনক মৃ*ত্যু*দ*ণ্ড আৰু ৭জনক যাৱজ্জীৱন কাৰাদণ্ডৰ শাস্তি প্ৰদান কৰা হয় যদিও উচ্চ ন্যায়ালয়ে ৰায় বাতিল কৰে।
২০০৬ চনৰ ১১ জুলাইত মুম্বাইত সংঘটিত হোৱা বিস্ফোৰণত ১৮৯ জন লোকে প্ৰাণ হেৰুৱাইছিল।এই গোচৰত ২০১৫ চনত ১৩ জন অভিযুক্তৰ ভিতৰত ১২ জনক দোষী সাব্যস্ত কৰিছিল অধিবেশন আদালতে। ইতিমধ্যে এজন অভিযুক্তৰ মৃত্যু হৈছে।
সূত্ৰ অনুসৰি, চলিত বৰ্ষৰ জানুৱাৰী মাহত গোচৰৰ চূড়ান্ত শুনানি সম্পূৰ্ণ হৈছিল যদিও ইয়াৰ ৰায় সংৰক্ষিত আছিল। এই আটাইকেইজন অভিযুক্ত নাছিক, য়েৰাৱাদা আৰু নাগপুৰৰ কাৰাগাৰত আছে। তেওঁলোকৰ শুনানি ভিডিঅ’ কনফাৰেন্সিঙৰ জৰিয়তে কৰা হৈছিল।
মুম্বাইত সংঘটিত হোৱা বিস্ফোৰণত ১৮৯ জন লোকৰ মৃত্যুৰ সমান্তৰালকৈ ৮২৭ জন যাত্ৰীও গুৰুতৰভাৱে আহত হয়। ১১ জুলাইত মাত্ৰ ১১ মিনিটত ৭টা বিস্ফোৰণ সংঘটিত হৈছিল। অধিবেশন আদালতৰ সিদ্ধান্তৰ পিছত অভিযুক্তই উচ্চ ন্যায়ালয়ৰ কাষ চাপিছিল, য’ত তেওঁলোকক দোষমুক্ত কৰা হৈছিল।
অভিযুক্ত মহম্মদ ফৈছাল শ্বেখ, এহতেশ্বাম ছিদ্দিকী, নৱেদ হুছেইন খান, আছিফ খান আৰু কমল আনছাৰীক মৃ*ত্যু*দ*ণ্ডৰ শাস্তি প্ৰদান কৰা হয়। ২০২২ চনত কৰ’না ভাইৰাছৰ বাবে কাৰাগাৰত মৃত্যু হৈছিল কমল আনছাৰীৰ।
পিটিআইৰ প্ৰতিবেদন অনুসৰি আদালতে কয় যে, অভিযুক্তৰ বিৰুদ্ধে গোচৰটো প্ৰমাণ কৰাত বিচাৰ বিভাগ সম্পূৰ্ণৰূপে ব্যৰ্থ হৈছে। অভিযুক্তই এই অপৰাধ সংঘটিত কৰিছে বুলি বিশ্বাস কৰাটো টান, সেয়েহে তেওঁলোকৰ দোষী সাব্যস্ত হোৱাটো বাতিল কৰা হৈছে।
