মুম্বাইৰ লগতে মহাৰাষ্ট্ৰৰ বহু জিলাত ধাৰাবাহিকভাৱে হোৱা ধাৰাসাৰ বৰষুণে ব্যাহত কৰিছে সাধাৰণ জীৱন-ধাৰণ। মুম্বাই, থানে, পালঘৰ আৰু নৱী মুম্বাইৰ বহু অঞ্চলৰ পথত পানী জমা হোৱাৰ বাবে পৰিস্থিতি অধিক অচল হৈ পৰিছে। থানে আৰু পালঘৰ জিলাত ১৮–১৯ আগষ্টৰ বাবে আইএমডিয়ে ৰেড এলাৰ্ট জাৰি কৰিছে। ইয়াৰ বাবে বিদ্যালয়-মহাবিদ্যালয়ত বন্ধ ঘোষণা কৰা হৈছে।
একে সময়তে মুম্বাইৰ নন্দদ জিলাত ২০০ৰো অধিক লোক আবদ্ধ হৈ পৰিছে, যি ঠাই খালী কৰাৰ বাবে সেনাবাহিনীক নিয়োগ কৰিবলগীয়া হৈছিল। মুখ্যমন্ত্ৰী দেৱেন্দ্ৰ ফাদনভিছে নিশ্চিত কৰিছে যে, এই পৰ্যন্ত ৭ জন লোকৰ মৃত্যু হৈছে।
মুম্বাইৰ আন্ধেৰী আৰু বৰিভালিত মাত্ৰ ৩ ঘণ্টাৰ ভিতৰতে ধাৰাসাৰ বৰষুণৰ ফলত ৫০ মিলিমিটাৰতকৈ অধিক পানী পৰে। বৰিভালিৰ পৰা চাৰ্চগেটলৈকে অঞ্চলসমূহত আগন্তুক কেইঘণ্টামানৰ ভিতৰত বৰষুণ তীব্ৰতৰ হোৱাৰ সম্ভাৱনা আছে। কল্যাণৰ জয় ভৱনী নগৰ অঞ্চলৰ নেটিভলী পাহাৰত ভূমিস্খলন হোৱাৰ পিছতে স্থানীয় বাসিন্দাসকলক ওচৰৰ পৌৰসভাৰ বিদ্যালয়লৈ স্থানান্তৰ কৰা হয়। তেওঁলোকৰ বাবে খাদ্য আৰু থকাৰ ব্যৱস্থাও কৰা হৈছে। জিলা প্ৰশাসনে ইয়াত সেনা আৰু এন ডি আৰ এফৰ দল মোতায়েন কৰিছে।
মন্ত্ৰালয়ত অৱস্থিত জৰুৰীকালীন কেন্দ্ৰৰ পৰা পৰিস্থিতি পৰ্যালোচনা কৰি ফাদনৱীছে কয় যে, ৰত্নাগিৰি, ৰায়গড় আৰু হিংগোলী জিলাতো ধাৰাসাৰ বৰষুণ হৈছে। বিদৰ্ভ অঞ্চলত দুই লাখ হেক্টৰৰো অধিক শস্য ধ্বংস হোৱাৰ লগতে ৮০০ খন গাঁও ক্ষতিগ্ৰস্ত হয়। মুম্বাইত ৮ ঘণ্টাত ১৭০ মিলিমিটাৰ বৰষুণ হোৱাৰ ফলত ১৪টা ঠাইত পানী জমা হোৱাৰ বিপৰীতে মাত্ৰ দুটা স্থানত যাতায়ত ব্যাহত হয়।
তেওঁ কয় যে, আগন্তুক ১০–১২ ঘন্টা অতি গুৰুত্বপূৰ্ণ আৰু স্থানীয় সংস্থাসমূহক বন্ধ ঘোষণা কৰাৰ অধিকাৰ দিয়া হৈছে। মাৰাথৱাদা অঞ্চলত যোৱা ৫ দিনত ৬ জন লোকৰ মৃত্যু হোৱাৰ লগতে ২০৫ টা পশুধনৰ মৃত্যু হোৱাৰ খবৰ পোৱা গৈছে।
