শনিবাৰে পুৱতি নিশা মুম্বাইৰ কান্দিৱলী অঞ্চলত মাৰাঠী অভিনেত্ৰী উৰ্মিলা কোথাৰেৰ বাহনৰ খুন্দাত এজন শ্ৰমিকৰ মৃত্যু হোৱাৰ লগতে আন এজন গুৰুতৰভাৱে আহত হয়। এই তথ্য প্ৰদান কৰে আৰক্ষীয়ে।
এগৰাকী বিষয়াই জনোৱা মতে, এই দুৰ্ঘটনাত অভিনেত্ৰীগৰাকী আৰু তেওঁৰ চালকজনো আহত হয়। শ্বুটিং শেষ কৰি ঘৰলৈ উভতি আহি থকাৰ সময়ত এই দুৰ্ঘটনাটো সংঘটিত হোৱা বুলি জানিবলৈ দিয়ে আৰক্ষী বিষয়াজনে।
আৰক্ষীৰ মতে, সঠিক সময়ত গাড়ীৰ এয়াৰবেগ খোল খোৱা বাবে অভিনেত্ৰীগৰাকীৰ জীৱন ৰক্ষা পৰে। মুম্বাইৰ কান্দিৱলী অঞ্চলৰ পোইছৰ মেট্ৰ’ ষ্টেচনৰ সমীপত এই ঘটনা সংঘটিত হয়, য’ত এখন দ্ৰুতবেগী গাড়ীয়ে মেট্ৰ’ত কৰ্মৰত দুজন শ্ৰমিকক খুন্দা মাৰে। এই ঘটনাত এজন শ্ৰমিকৰ মৃত্যু হয়, আনহাতে আনজন শ্ৰমিক গুৰুতৰভাৱে আহত হয়।
তীব্ৰ বেগী বাহনখনে নিয়ন্ত্ৰণ হেৰুওৱাৰ ফলতেই এই ভয়ংকৰ দুৰ্ঘটনাটো সংঘটিত হোৱা বুলি আশংকা প্ৰকাশ কৰিছে আৰক্ষীয়ে। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
